Një ndër akset më të ngarkuara, Shkodër-Lezhë, është përgjakur mëngjesin e kësaj të hënë nga dy jetëhumbje tragjike. Viktimat janë të një Fiati që goditi nga pas një zetor, ndodhur kjo te vendi i quajtur “Kthesa e Kallmetit”.
Njoftimi i Policisë thotë se “rreth orës 05:00, në vendin e quajtur ‘Kryqëzimi i Kallmetit’, shtetasi P. M. banues në Tale, Lezhë, duke drejtuar automjetin tip Fiat, ka goditur nga pas karrelin e një mjeti bujqësor zetor i drejtuar nga shtetasi A. T. banues në Gocaj, Lezhë.
Për pasojë kanë ndërruar jetë drejtuesi i mjetit Fiat, shtetasi P. M., 56 vjeç, si dhe pasagjeri po në këtë mjet shtetasi M. Gj., 54 vjeç. Grupi hetimor vazhdon veprimet hetimore për sqarimin e plotë të rrethanave të aksidentit”.
Më konkretisht, jetëhumburit janë: Prend Marku dhe Martin Gjoka.
Drejtuesi i zetorit, Ardian Toma, ka shpëtuar me plagë të lehta.
Ky aksident i radhës në aksin Lezhë – Shkodër, kryesori i veriut, apelon për nevojën si të zgjerimit të kësaj rruge, e cila duhet të shkojë drejt tre ose katër korsisë, si dhe ndalimit të qarkullimit në të mjeteve të tilla, si zetorë apo të ngjashëm, të cilat bëhen shkak për tragjedi të tilla. /tesheshi.com/
