Zëri i Amerikës i ka kushtuar një artikull situatës së re politike gjatë kësaj fushate elektorale, duke veçuar pozitën e LSI-së përballë dy forcave të mëdha, PS dhe PD, të cilat po e sulmojnë atë si një parti klienteliste.
PS-ja nga ana e saj për klientelizmin në shtet, me anë të punësimeve, duke cenuar drejtpërdrejt cilësinë e shtetit dhe të shërbimeve publike; ndërsa PD ngase shumë eksponentë e anëtarë të saj në bazë, janë “blerë” nga LSI në këmbim të vendeve të punës.
Në shkrimin e saj, VOA paraqet situatën e këtyre ditëve me shkarkimet e njëpasnjëshme në administratë, ku dominojnë emra të LSI-së, të akuzuar si shkelës ligji me pjesëmarrjen në fushatë duke abuzuar me postin publik.
Dhe në fund, aty gjendet dhe arsyeja se përse Meta, tashmë President i emëruar, është përfshirë në fushatë përkundër premtimit që dha se nuk e bënte një gjë të tillë.
“LSI-ja e cila është konsideruar si vendimtare për përcaktimin e pushteteve, pas 4 vitesh në qeveri me demokratët dhe 4 të tjerave më pas me socialistët, duket se është gjendur e papërgatitur për situatën e krijuar, ku dy partitë e mëdha e kanë vënë në qendër të sulmeve. Pikërisht kjo duket të jetë dhe arsyeja që udhëheqësi dhe themeluesi i saj Ilir Meta, ka zbritur në fushatë, pavarësisht se në momentin e zgjedhjes si president kishte deklaruar se nuk do të përfshihej”, shkruan VOA në shkrimin e saj.
Dhe në fakt, edhe pse Meta nuk e ka marrë ende detyrën e kreut të shtetit, etika politike do e donte që ai mos angazhohej me fushatë, ndonëse ligjërisht është në rregull në raport me pozicionin aktual. /tesheshi.com/
