Tenistit spanjoll, 14 herë fitues i turneve Grand Slam, i është kërkuar të japë mendim mbi Maria Sharapovën, e cila pranoi ditë më parë se kishte përdorur një substancë të ndaluar, me ç’rast është ngacmuar dhe për zërat që qarkullojnë se dhe ai ka bërë diçka të ngjashme.
Fillimisht ai është përgjigjur për tenisten ruse, për të cilën ka thënë: “Dua të besoj se është një gabim për Marian. Ajo nuk deshi ta bënte atë. Por qartësisht është një pakujdesi. Ajo duhet të paguajë për të.”
E kur ka ardhur puna për të dhënë përgjigje për veten, Nadal ka treguar se është i lodhur nga thashethemet se edhe ai ka përdorur substanca të ndaluara.
“Unë jam një djalë krejtësisht i pastër. Kurrë nuk kam patur tundimin për të bërë diçka të gabuar,” ka thënë tenisti 29-vjeçar, një kohë numri një i botës.
Objekt i spekulimeve të ndryshme për doping, Nadal ka sqaruar: “Besoj në sportin dhe në vlerat e sportit. Sporti është një shembull për shoqërinë. Eshtë një shembull për fëmijët, dhe nëse bëj diçka që bie në kundërshtim me këtë, do të jem duke gënjyer vetveten, e jo kundërshtarët.”
Rafael Nadal nuk po kalon një moment të mirë në karrierën e tij tenistike, për shkak të problemeve fizike. /tesheshi.com/
