Petro Poroshenko, presidenti i Ukrainës, është pritur dje në Ankara nga presidenti turk, Rexhep Tajjip Erdogan, gjatë një vizite zyrtare në Turqi.
Të dy kryetarët e shteteve kanë dhënë një konferencë të përbashkët për shtyp, ku Erdogani ka deklaruar se vendi i tij as e ka njohur e as do ta njohë aneksimin e paligjshëm të Krimesë nga Rusia.
Në të njëtën linjë, duke folur për ndërhyrjen ushtarake të Rusisë në Ukrainë, Erdogani është shprehur kështu: “Rusia thotë se ka hyrë në Siri e thirrur nga administrata siriane. Vras mendjen se kush u kërkoi atyre të hyjnë në Ukrainë?”
Erdogani ka kërkuar largimin e trupave të huaja nga territori ukrainas, e vendosjen e kontrollit në kufirin me Rusinë. Gjithashtu ai ka çmuar reformat e kryera në Ukrainë, si dhe mëkëmbëjen ekonomike gjatë presidencës së Poroshenkos. “Një Ukrainë e fuqishme, e cila e ka forcuar stabilitetin e vet politik, është në të njëjtën kohë një garanci për rendin dhe paqen rajonale.”
Në përgjigje, Poroshenko e ka përshkruar Turqinë si një vend mik dhe partner.
Turqia gjendet prej muajsh në një përplasje me Rusinë për shkak të një avioni rus të rrëzuar nga forcat turke, gjë e cila ka ndikuar posaçërisht në aspektin ekonomik. Turizmi turk, që përbën një zë të rëndësishëm në të ardhurat e vendit, e ka ndjerë veçanërisht krizën mes dy vendeve.
Autoritetet turke po mundohen të krijojnë tregje të reja për t’i minimizuar efektet e krizës me Rusinë.
Erdogani do të shprehej në këtë këndvështrim në konferencën për shtyp me homologun ukrainas: “Popullsia e përgjithshme e Turqisë dhe Ukrainës është rreth 125 milionë; ky është një treg serioz.”
Në këtë kuadër u nënshkruan marrëveshje për nxitjen e lidhjeve mes dy vendeve në tregti, në transport, në turizëm, në energji e kulturë. /tesheshi.com/
