Parlamenti Evropian, me 621 vota pro, 49 kundër dhe 13 abstenime, ka mbështetur marrëveshjen e daljes nga Mbretëria e Bashkuar, ndryshe Brexit.
Miratimi i Parlamentit Evropian dhe pëlqimi zyrtar i Këshillit është procedura e fundit ligjore e nevojshme për Mbretërinë e Bashkuar që të largohet nga Bashkimi Evropian në mesnatën e 31 janarit.
“Vota historike” që konfirmon largimin e parë konsensual nga BE nga një shtet anëtar u zhvillua në një atmosferë ceremoniale.
Në debatin që i parapriu votimit, më së shpeshti dëgjohej se dalja nuk ishte “lamtumirë” por “fat i mirë” dhe “mirupafshim”.
Në varësi të pozicionit të tyre politik në raport me Brexit, deputetët britanikë ose përcollën gazmendin ose i thanë BE-së se do të ktheheshin.
“Ne të gjithë jemi shumë të trishtuar që po na ikën një vend që ka qenë prej kohësh anëtar i familjes së BE-së. Ne gjithmonë kemi respektuar plotësisht vendimin e popullit britanik. Ju jeni partnerët dhe aleatët tanë dhe ne gjithmonë do të kemi një marrëdhënie të ngushtë. Ju po largoheni nga BE, por gjithmonë do të jeni pjesë e Evropës”, tha pas votimit Presidenti i Parlamentit Evropian, David Sassoli.
Parlamenti Evropian po planifikon një ceremoni uljeje flamuri për 1 shkurt, e cila është ngjitur me flamujt e 27 vendeve të tjera anëtare përpara selisë së Parlamentit në Bruksel.
Flamuri britanik do të përfshihet në koleksionin e Muzeut të Historisë Evropiane, i cili është në afërsi të Parlamentit Evropian në Bruksel.
Marrëveshja e ndarjes së arritur nga Bashkimi Evropian dhe Mbretëria e Bashkuar parashikon mbrojtjen e të drejtave të qytetarëve të shteteve anëtare të BE-së, të cilët mbesin në Mbretërinë e Bashkuar pas Brexit dhe anasjelltas. Janë pajtuar gjithashtu për detyrimet financiare që Londra duhet të shlyejë drejt Unionit, si dhe mënyra se si do funksionojë kufiri midis Irlandës dhe Irlandës Veriore në të ardhmen.
Pas Brexit, një periudhë tranzicioni midis dy palëve është parashikuar deri në fund të vitit 2020.
Gjatë kësaj periudhe, Mbretëria e Bashkuar është zotuar të vazhdojë të respektojë ligjin e Unionit si një “vend i tretë”.
Komisioni Evropian do të paraqesë një plan për negociatat mbi marrëdhëniet e ardhshme midis Londrës dhe Brukselit deri në mars.
Largimi i Mbretërisë së Bashkuar nga BE do të ndryshojë përbërjen dhe numrin e Parlamentit Evropian, i cili do të bjerë nga 751 në 705 eurodeputetë.
Me largimin e 73 deputetëve në Mbretërinë e Bashkuar, 27 vende do të mbushen nga deputetë nga 14 shtete të tjera anëtare, ndërsa 46 vende do të presin përfaqësuesit e “shteteve të mundshme anëtare të ardhshme”. /tesheshi.com/
