Në një intervistë të dhënë për gazetaren e mirënjohur të CNN-it, Christiane Amanpour, zëdhënësi i koalicionit arab, gjeneral Ahmed Asiri, ka dhënë përgjigje për një fotografi ku tregohet një 18-vjeçare jemenase thuajse e mbaruar nga uria.
Amanpour e pyeti gjeneralin në e kishte parë fotografinë, duke mos e fshehur tendenciozitetin.
Ahmed Asiri shpjegoi se fotografia ishte bërë në Taiz, një qytet i rrethuar nga huthinjtë, rebelët e ngritur me armë kundër qeverisjes në vend.
“Jam i sigurt se kjo fotografi është bërë në Taiz, që është i rrethuar nga huthinjtë. Mbase njerëzit e harrojnë sot Taizin,” u përgjigj zëdhënësi i koalicionit arab që vepron për të kthyer rendin në Jemen.
“Kjo është arsyeja pse lëvizim në Jemen: për të shmangur shfaqjen e kësaj tabloje. Për t’i dhënë popullsisë në Jemen të drejtën për t’u trajtuar mirë, për të patur të drejtat e tyre,” i ka shkuar më tej përgjigjes Asiri.
Për gjendjen humanitare në Jemen, ai ka bërë fajtor bashkësinë ndërkombëtare.
“Kjo është përgjegjësi e bashkësisë ndërkombëtare. Nëse nuk e zgjidhim problemin në Jemen, të gjithë ne jemi përgjegjës.” /tesheshi.com/
