Shkencëtarët kanë zbuluar një planet të ri, më i afërti i zbuluar ndonjëherë jashtë sistemit tonë diellor.
Bëhet fjalë për një planet të vogël, shkëmbor të quajtuar Proxima b, i cili rrotullohet përreth yllit Proxima Centauri, më afër diellit.
Edhe pse është më i vogël sesa toka, ai ndodhet në “zonën e banueshme”, që do të thotë se ka gjasa që në sipërfaqe të tij të ketë ujë.
Astronomët kanë dyshuar prej kohësh se rreth këtij ylli rrotullohet planeti, por nuk kanë pasur të dhëna.
Tani është publikuar një studim në revistën Nature, që ka ofruar të dhënat më të mira deri më tani në lidhje me këtë zbulim.
“Kjo është kaq frymëzuese, ky është ylli ynë më i afërt”, thotë Lisa Kaltenegger, një shkenctare e cila është e përfshirë në këtë studim.
Nga ajo çfarë njohin deri më tani shkencëtarët në lidhje me planetet të cilat formohen përreth yjeve xhuxh, Proxima b është sipas të gjitha gjasave shkëmbore porsi Toka, Venera dhe Marsi, dhe është e mundur që njëra anë e saj të jetë gjithmonë e kthyer kah dielli, kurse ana tjetër të jetë e errët.
Proxima b është 4,25 vite dritë larg nga Toka, ndërsa është më afër ndaj yllit të saj se sa planeti ynë ndaj diellit, dhe i nevojiten vetëm 11,2 ditë për të bërë një rrotullim rreth tij. /tesheshi.com/
