“Shqisa e gjashtë” që përdorin zogjtë për të shquar fushën magnetike të Tokës është çmitizuar së fundmi, teksa dy grupe shkencëtarësh thonë se kanë gjetur burimin e kësaj aftësie të këtyre gjallesave.
Zogjtë orientohen duke përdorur fushën magnetike jo vetëm në fluturimin e tyre ditor, por edhe në shtegtimet e gjata nga një kontinent në tjetrin. Kjo lloj aftësie e tyre është cilësuar nga shkencëtarët si “magnetorecepsion”, por mënyra e hollësishme se si zogjtë arrinin ta bënin një gjë të tillë, nuk ka qenë e qartë. Tashmë, shkencëtarët kanë zbuluar një lëndë në sytë e zogjve, e cila u jep atyre aftësinë për të shquar fushat magnetike. Kjo lëndë është proteina e quajtur Cry4.
Në studimet e bëra në mënyrë të pavarur nga njëri-tjetri, dy grupe shkencëtarësh, njëri i Universitetit Lund në Suedi dhe tjetri i Universitetit të Oldenburgut në Gjermani, pasi kanë vrojtuar dy lloje zogjsh (gushëkuqët dhe trishtilët), kanë dalë në përfundimin se është pikërisht proteina Cry4, ajo që u mundëson këtyre gjallesave shikimin e fushave magnetike.
Shkencëtarët e Universitetit të Oldenburgut vunë re se me afrimin e periudhës së shtegtimit, te gushëkuqët rritej niveli i proteinës Cry4, që me sa duket i përgatiste ata për rrugëtimin e gjatë që i priste. Teksa të dy grupet e shkencëtarëve kanë dalë në përfundime të njëjta, ata sërish theksojnë se duhen bërë hulumtime të mëtejshme në lidhje me këtë fenomen. /tesheshi.com/
