Dy rrjete të nanokristaleve të mbivendosura në lëkurë, për të riorganizuar përshtatjen dhe ndryshimin, në bazë të situatave, në mënyrë që brenda pak sekondash të bëhet ndryshimi i ngjyrës së lëkurës.
Në këtë mënyrë kameleoni arrin të ndryshojë pamjen e tij të jashtme, sipas një studimi të kryer nga një ekip shkencëtarësh zviceranë, të cilët në “Nature Communications” përshkruajnë “sekretet” e garderobës shumëngjyrëshe të reptilit më të transformueshëm në planet.
Nëse deri më tani ishte venë re një mekanizëm që i lejonte të bënte kalimin nga një tonalitet i errët i ngjyrës së lëkurës, në një tjetër, ngelej i pazbuluar, mister, arsyeja që mundësonte këtë ndryshim.
Sekreti nuk qëndron në pigmentet e veçanta, por në një lojë të interferencave optike mes lëkurës dhe dritës. Puna shkencore dhe përfundimet e saj mbajnë firmën e biologëve dhe fizikanëve nga Fakulteti i Shkencave në Universitetin e Gjenevës, të drejtuar nga Michel Milinkovitch e Dirk van der Marel.
Studiuesit kanë treguar se ndryshimi i ngjyrës ndodh nëpërmjet aktivizimit të një rrjeti nanokristalesh të pranishme në një shtresë sipërfaqësore të qelizave të këtij zvarraniku.
Duke u riorganizuar këto nanokristale, në mënyrë të ngjashme siç ndodh me një instrument muzikor, kameleonët janë në gjendje të reflektojnë në mënyrë selektive në varësi të gjatësisë së valës së dritës dhe të ndryshojnë shpejt e shpejt ngjyrën./tesheshi.com/
