Portali rus “Sputnik” ka publikuar një lajm të shoqëruar edhe me video mbi punimet që kinezët po zhvillojnë në Mal të Zi për të ndërtuar autostradën që lidh Tivarin me Boljare-n, që është pikë fundore në kufi me Serbinë, për t’u lidhur me autostradën e Beogradit.
Ky investim është ndërmarrë nga banka kineze Exim Bank, e cila në fillim mori përsipër të financojë Rrugën e Arbrit dhe më pas e la në mes.
Ministri i Transportit dhe Punëve Detare të Malit të Zi, Osman Nurkoviç vizitoi vendin e ndërtimit të autostradës Bar-Boljare deklaroi për “Sputnik” se “e gjitha ajo që ne kemi parë sot është mbresëlënëse. Në asnjë moment nuk dyshoj se punimet do të kryhen në përputhje me standardet më të larta të ndërtimit dhe për kënaqësinë e qytetarëve”.
Autostrada nisi të ndërtohej më 11 maj 2015, pikërisht në kohën e zgjedhjeve lokale kur kinezët u përplasën me Ramën për Rrugën e Arbrit.
Rruga po ndërtohet nga kompania kineze CRBC.
Rruga do të përfundojë në vitin 2019 dhe është pjesë e investimeve kineze për Europën Juglindore.
Pekini ka nisur ndërtimin e një linje hekurudhore që do të lidhë Budapestin me Kinën, duke kaluar natyrisht nëpër ish-rrugën e mëndafshit. Kjo rrugë është dhe pjesë e planit strategjik kinez për të depërtuar në Europë nëpërmjet porteve të Ballkanit.
Përveç Tivarit kinezët kanë shprehur interes dhe për Shëngjinin e Durrësit për të ndërtuar parqe industriale, por duket që prioritet kanë mbetur pjesët e Serbisë. /tesheshi.com/
