Zbatimi i reformës së menaxhimit financiar ka sjellë “frytet” e para në buxhetin e shtetit. Ambasadorja e Bashkimit Evropian, Romana Vlahutin deklaroi se Komisioni Evropian ka paguar pjesën e parë prej rreth 14 milionë eurosh buxhetit shqiptar, bazuar në performancën dhe progresin e deritanishëm që ka reflektuar realizimi i kësaj reforme.
“Përmirësimi i menaxhimit financiar publik është një element i domosdoshëm për BE-në që të sigurojë mbështetje edhe për reforma të tjera dhe është në veçanti një kusht konkret për disbursimin e rreth 130 milionë € të vendosura deri tani, nga zarfi i përgjithshëm prej 650 milionë €, për periudhën 2014-2020, duke mbështetur reformat në administratën publike, punësim dhe arsim profesional, transportin dhe në luftën kundër korrupsionit”, u shpreh Vlahutin, në një deklaratë për shtyp.
Sipas saj, një menaxhim më transparent i burimeve të kufizuara të shtetit mund të sjellë një ndikim shumë më të madh, se sa fondet që siguron BE-ja përmes kursimeve, shpenzimeve më efikase, më të prioritizuara dhe më me vlerë për paratë, prokurimit konkurrues, reduktimit të mbetjeve dhe korrupsionit.
“Rritja e transparencës dhe llogaridhënies te qytetarët për të pasur qasje në informacionin mbi përdorimin e burimeve publike dhe çfarë rezultatesh arrihen është një tjetër element thelbësor i reformës. Rezultatet e tij mund t’i mundësojnë Shqipërisë t’i përballojë më mirë shërbimet publike, si drejtësia e paanshme, rrugët e sigurta, përkujdesje shëndetësore me cilësi të mirë, ushqim i sigurt, mbledhje efikase e mbetjeve, ujë i pijshëm i pastër dhe higjienë”, tha ambasadorja, duke shtuar se që prej fillimit të reformës, Shqipëria ka bërë progres në zbatimin e strategjisë për menaxhimin financiar publik.
“Është bërë progres, për shembull, në likuidimin e pagesave të prapambetura, si borxh i fshehtë për shkak të faturave dhe TVSh-së së papaguar kompanive, të akumuluara para vitit 2013, rishikimin e ligjit për sistemin e buxhetit, forcimin e procedurave të kontrollit të brendshëm dhe kapacitetit për inspektime financiare, më shumë qasje online në sistemin e thesarit, lufta kundër informalitetit, përmirësimi i manualeve të auditimit të jashtëm dhe rritja e transparencës së buxhetit. Struktura e Ministrisë së Financave është përmirësuar. Vlerësimi i radhës i KE-së për zbatimin e reformës pritet në pranverë 2017”, theksoi ajo.
Vlahutin e mbyll deklaratën e saj duke apeluar institucionet qeveritare, si Kontrollin e Lartë të Shtetit dhe Parlamentin se kanë detyrimin ta kryejnë dhe të lehtësojnë zbatimin e kësaj reforme, sipas mandatit të tyre. Ndërsa për qytetarët, shton Vlahutin, institutet kërkimore dhe gjithë aktorët jo-shtetërorë është në interesin e tyre më të mirë të luajnë rol dhe të angazhohen më intensivisht për ta shfrytëzuar zbatimin e reformës./tesheshi.com
