Nga Blendi Gashi
Qeveria holandeze ka konfirmuar se Gjykata Speciale do të ketë mandat për t’i trajtuar edhe vrasjet politike, dosjet e të cilave drejtësia kosovare kurrë nuk i ndriçoi.
Kështu, përfundimisht është hequr dilema e madhe se kjo gjykatë e cila do të quhet Institucion Gjyqësor i Specializuar i Rilokuar i Kosovës (IGjSRK), nuk do të merret me vrasjet e pasluftës që nodhën në vitet 1999-2000.
Pas këtij konfirmimi pritet që Specialja të trazojë fuqishëm skenën politike dhe, tani e tutje nuk është i sigurt që mund të mbijetoë “martesa e detyrurar” PDK-LDK. Të paktën kështu thonë deputetë dhe njohës të rrethanave politike në vend.
Arsyeja është se pas luftës janë vrarë shumë drejtues të lartë të LDK-së, ndërkohë që gishti çdo herë është drejtuar nga Shërbimi Informativ i Kosovës (SHIK) që drejtohej nga zv.kryetari aktual i PDK-së, Kadri Veseli.
Deputeti i LDK-së, Adem Salihaj, ndaj të cilit pas lufte pati atentat për vrasje, ka thënë për portalin tesheshi.com se Specialja padyshim se mund ta trondit skenën politike në vend, por ai sheh këtë si diçka positive, pasi thotë se vendi do të çlirohej nga PDK-ja.
“Nuk e besoj që do të vijë deri te prishja e koalicionit për këtë çështje, sado që do të duhej të prishej. LDK nuk do të duhej të rrinte në koalicion me një parti që ka vrarë veprimtarët më të devotshëm të saj. Madje, ky fakt edhe tash është i njohur, edhe pa një konfirmim të Gjykatës Speciale. Dërgimi e disa figurave kyçe të PDK-së në Gjykatën Speciale, domosdo në fillim mund ta trazojë këtë parti, e kjo parti mund ta trazojë Kosovën; por më vonë Kosova do të çlirohet dhe do të qetësohet nga soji i hajnave dhe kriminelëve”, thotë Salihaj.
Studiuesi i shkencave politike, Baki Azemi, ka deklaruar për tesheshi.com se çdo nismë e zbardhjes së krimeve të vrasjeve me karakter politik, do të thotë drejtim i gishtit ndaj njëri-tjetrit te strukturat oligarkike që e kanë okupuar pushtetin shtetëror në Kosovë, dhe përmes kleptokracisë po e dëmtojnë funksionimin e shtetit dhe sundimin e ligjit në vend.
“Ky proces i zbardhjes nuk do shënojë vetëm fundin e strukturave të inkriminuara të instaluara në shtet, shoqëruar edhe me lustracionin e pastërtisë së personalitetit të tyre, por edhe fundin e koalicionit brenda pozitës (LDK-PDK) dhe opozitës (VAN), që pjesa dërmuese e tyre nuk janë pa mëkate. Kosova ka nevojë për një sistem vlerash të kategorizuara dhe mbrojtura me ligj për të krijuar stabilitet afatgjat”, është shprehur Azemi.
Analisti politik, Faik Krasniqi thotë për tesheshi.com se nëse Gjykata Speciale krahas trajtimit të krimeve të luftës, trajton edhe vrasjet politike dhe krimet ekonomike, atëherë skena politike në Kosovë do të pësoj tronditje të madhe.
“Protagonistët kryesorë të kësaj klase politike, janë përgjegjësit kryesorë për të gjitha krimet politike dhe ekonomike që i kanë ndodhur dhe po i ndodhin shtetit të Kosovës. Koalicioni PDK-LDK do të rrëzohet në shumë variante, duke nisur që nga zgjedhja e Presidentit, marrëveshjet e fundit dhe Gjykata Speciale”, ka deklaruar Krasniqi.
Edhe avokati i njohur Tomë Gashi, ka thënë në një emision televiziv se Specialja do të ketë pasoja për koalicionin qeverisës PDK-LDK.
“Në komunikatë (të qeverisë holandeze) thuhet se do të hetohen vrasjet e ashtuquajtura politike të zyrtarëve të LDK-së dhe kjo ndoshta edhe do të ketë pasoja për koalicionin qeverisës. Unë jam gjithmonë në anën e viktimave dhe shpresoj që të gjinden ata që kanë kryer vrasjet ndaj zyrtarëve të LDK-së apo kujdo qoftë për motive politike, sepse vrasjet asnjëherë nuk janë të arsyetueshme, vetëm gjatë luftës dhe në vetmbrojtje”, ka thënë ai.
Specialja do të nis punën gjatë këtij viti. Objekti i saj do të jetë në ish–objektin e Europolit derisa të ndërtohet një aneks i ri.
Vendimi për ta vendosur gjykatën në Hagë është bërë pas konsultimeve ndërmjet BE-së, Kosovës dhe Autoriteteve Holandeze. Gjykata do të paguhet nga fondet e BE-së. /tesheshi.com/
