Zbulohen pjesë të paktit detar që kanë arritur Tirana dhe Athina pas dy raunde negociatash në Kretë dhe Korçës.
Korrespondenti i Top Channel në kryeqytetin grek, Artur Bibe, duke iu referuar burimeve në ministrinë e Jashtme të Greqisë thekson se në marrëveshjen e re Shqipëria ka fituar të gjithë ato pjesë të detit që i kishte humbur në vitin 2009 me format e Bashës dhe Bakojanisit.
Siç bën të ditur TCH, largësia nga Korfuzi në Ksamil ndahet përgjysëm nga dy vendet, e me po nën të njëjtën mënyrë veprohet në të gjithë gjatësinë detare me Greqinë nga Himara në Sarandë.
Përsa i përket zgjatimit të sovranitetit grek me 12 milje, sikundër tha edhe ministri i Jashtëm Nikos Kotzias, ajo do të bëhet nga të dy vendet njëkohësisht.
Në marrëveshjen mes dy vendeve, të përfunduar në Kretë por të detajuar përfundimisht në Korçë sqarohet se llogaritja e 12 miljeve do të bëhet nga ishulli i fundit i banuar në 1913, periudhë që mes dy vendeve është caktuar një vijë e përafërt kufitare.
Siç bën të ditur Top Channel: “Marrëveshja do të bazohet në të drejtën ndërkombëtare të detit për përdorimin e fareve, sipas të cilës faret dhe shkëmbinjtë, ose ishujt ku ata janë ndërtuar, i jepen për administrim vendit që i ka ndërtuar.
Statusi territorial i këtyre fareve dhe i ujërave që i rrethojnë ata, nuk referon pikë nisjeje të 12 miljeve, ose vijës së mesit, siç ishte vendosur në marrëveshjen e 2009, me shkëmbin Bakreta në Ngushticën e Ksamilit, duke i dhënë Greqisë 3/4 e hapësirës detare. Pala greke thotë se me mënyrën e re të matjes dhe pikat referuese të vendosura nga Bushati dhe Kotzias në Kretë, Shqiperia rivendos sovranitetin në atë pjesë detare që humbi me marrëveshjen e 2009”.
Mes dy vendeve do të ripërcaktohet zona ekskluzive ekonomike.
Shqipëria do ta zgjerojë atë në drejtim të perëndimit drejt kuadrateve “Joni 1” dhe “Joni 2”, të cilat në bazë të marrëveshjes së 2009 i merrte Greqia. Studimet gjeologjike të kryera që në vitet 1960 prej gjeologëve rusë dhe shqiptarë, por edhe kërkimet e kryera në vitet 2013- 2015 prej kompanive norvegjeze, konfirmojnë se atje gjendet naftë dhe gaz, si vazhdim i fushës naftëmbajtëse Patos-Marinëz-Vlorë.
Zyrtarët e Athinës theksojnë se Greqia dëshiron një zgjidhje sa më të shpejtë të çështjes, pasi dëshiron aplikimin e precedentit të përcaktimit detar me Shqipërinë ta përdorë edhe me shtete të tjera, ku më e rëndësishmja dhe e vështira për Greqinë është Turqia.
Greqia ka kontrollin e ishujve në pothuaj gjithë Egjeun të bazuar në Traktatin e Lozanës, i cili u kërkua të ndryshohet nga Presidentit turk Rexhep Tajip Erdogan, gjatë vizitës së tij një muaj më parë në Athinë.
Gazetari i Top Channel, duke iu referuar diplomatëve grekë theksoi se frika që Athina ka prej influencës së Presidentit turk në politikën shqiptare, e bën këtë marrëveshje edhe më emergjente. /tesheshi.com/
