Mediat shqiptare në Maqedoni kanë cituar burime nga LSDM-ja se kryeministri i mandatuar, Zoran Zaev i ka kërkuar Ali Ahmetit që të mos propozojë asnjë nga të dyshuarit apo që janë nën hetim nga Prouroria Speciale për korrupsion.
Në takimin e Zaevit dhe Ahmeti në kuadër të parimeve të bashkëqeverisjes është theksuar qëndrimi se nuk duhet të mbrohet askush që do të ndiqet nga drejtësia në të ardhmen. Kushtet e tilla më parë i ka theksuar edhe Lëvizja BESA.
Ndërkaq, BESA ka mbledhur kryesinë ku është ngritur edhe një komision i veçantë, i cili ngarkohet për të zhvilluar bisedimet.
Drejtues ose koordinator i këtij komisioni është caktuar të jetë Dr. Arben Labënishti, nënkryetar i Lëvizjes.
Në një komunikatë të BESA-s, theksohet se: “Në frymë të premtimit për transparencë me votuesin shqiptar, Kryesia Qendrore e BESËS e informon anëtarësinë e saj, por edhe opinionin në përgjithësi, se do të mbetet e përkushtuar në programin zgjedhor, me të cilin edhe garoi dhe mori besimin e qytetarëve shqiptarë në Maqedoni në zgjedhjet e 11 dhjetorit 2016. Për detajet dhe epilogun e bisedimeve opinioni do të informohet me kohë”. /tesheshi.com/
