Pas deklaratës fillestare në seancën e parë konstituive, sot pas njw muaj e gjysmë, lideri i LSDM-së Zoran Zaev sërish është paraqitur në foltoren e Kuvendit. Ai në fjalimin e tij tha se kanë kaluar më shumë se 30 ditë, shumica e re parlamentare duke lutur deputetët e VMRO-DPMNE mos të shkelin nenin 89 dhe 90 dhe të mundësojnë zgjedhjen e kryetarit të ri të Kuvendit.
“Shumica parlamentare po ju lut, ju po bëheni sikurse keni ra nga Marsi. Pesë javë po zgjat kjo seancë. Pohoni se keni shumicë por nuk e keni shumicën. Nga gjithsej 120 deputetë keni 51 deputetë këtu, 69 deputetët nga gjithsej 120 kërkojnë, lusin që të përfundoj procedura një orë e më parë. 62 qëndrojnë pas Talat Xhaferit të zgjidhet kryetar. Çka nuk është e qartë. Të ju lëmë dy muaj, tre”, tha Zaev.
Ai tha se ka kaluar koha kur kanë mundur të shkelin Rregullore dhe Kushtetutën e Maqedonisë.
“Mos e shkelni Rregulloren, Kushtetutën e Maqedonisë. Këtu ekziston një shumicë e re e deklaruar. Kjo shumicë ka të drejtë dhe obligim të zgjedh kryetarin e ri të Kuvendit. Dëshiroj të përmbahem procedurave”, shtoi Zaev.
Pas Zaev fjalim procedural kërkoi edhe nënkryetari i LSDM-së, Petre Shilegov. Sipas tij. kryetari i Kuvendit Trajko Veljanovski po shkel rregulloren pasi që po lejon deputetët e VMRO-së të keqpërdorin foltoren duke debatuar për tema të cilat nuk i tangojnë seancës konstituive.
“Nëse ju thoni se nuk mund t’ua merrni të drejtën e fjalës deputetëve të VMRO-DPMNE-së cilët janë paraqitur e keni gabim. Ju në bazë të rregullores së Kuvendit keni plotësisht të drejtë të ndërpritni çdo fjalim të deputetëve të cilët nuk kanë tematikë të përshtatshme lidhur me seancën konstituive”, deklaroi Petre Shilegov.
Më pas Shilegov shtoi se ky lloj i politikës së deputetëve të VMRO-së është niveli më i ulët që ka ekzistuar ndonjëherë në Maqedoni.
Nga ana tjetër, deputetët e VMRO-DPMNE-së paralajmërojnë se nuk do të tolerojnë në asnjë mënyrë të zhbllokohet Kuvendi derisa kusht për formimin e qeverisë së re është pranimi i Platformës së Tiranës nga ana e LSDM-së.
Ata insistojnë që zgjedhja më e mirë për tejkalimin e krizës politike në vend do ishin zgjedhje të reja parlamentare së bashku me ato lokale.
“Ne vlerësojmë se zgjedhje të reja parlamentare paralelisht me ato lokale janë zgjidhja më e mirë për krizën politike në vend. Në këto zgjedhje LSDM le të del me Platformën e Tiranës dhe të shohim nëse qytetarët do e votojnë. Ndryshe ne nuk e kemi ndërmend të lejojmë të tradhtohet populli maqedonas me një Platformë paszgjedhore”, thonë nga VMRO-DPMNE. /tesheshi.com/
