Gjatë një interviste për televizionin kombëtar kroat, HRT, lideri i LSDM-së, Zoran Zaev, përjashtoi mundësinë trazirave me karakter politik dhe etnik në Maqedoni, të cilat mund të çojnë në gjakderdhje. Ai tha se nuk beson që mund të ndodhë ndonjë konflikt.
“Frika ekziston dhe të gjithë jemi të frikësuar nga ajo gjë, por unë jam i sigurt se ajo nuk do të vijë. Nëse do duhej të kishte ndodhur kjo do të kishte ndodhur shumë më herët. Me shumë durim, përkushtim dhe zell, me anë të negociatave kemi ardhur këtu”, tha Zaev.
Më tej, ai mbrojti idenë e tij se plotësimi i kushteve shqiptare të parapara në platformën e tyre, nuk e cenojnë aspak shtetin; përkundrazi, sjellin një shoqëri të të gjithëve.
“Në këtë moment, oponenti im politik mbështetet nga presidenti, duke aluduar në ndarjet dhe federalizim, shkatërrimin e karakterit unitar të shtetit. Nëse publikisht keni sulmuar qytetarët të cilët janë më shumë se 20 për qind në Maqedoni, ata do të mbrojnë veten dhe pastaj ndarjet pasojnë. Nëse njerëzit bashkohen, atëherë shteti është më i fortë. Koncepti ynë është “Një shoqëri për të gjithë”, ndërsa e tyre “Maqedonia e Maqedonasve”. Jo, Maqedonia është e të gjithë qytetarëve të Maqedonisë”, theksoi Zaev.
Refuzimi që presidenti Ivanov i bëri atij duke mos i dhënë mandatin e formimit të qeverisë së re, ka trazuar jo pak skenën politike maqedonase. Tashmë nuk është vetëm Zaev të pret të mandatohet, por dhe BDI e Ali Ahmetit, e cila ka pranuar të hyjë në kolicion me LSDM-në. /tesheshi.com/
