Nga Mensur Krasniqi
Me afrimin e zgjedhjeve në Maqedoni, ka nisur dhe miklimi i elektoratit shqiptar, si nga pushteti ashtu dhe nga opozita. Dhe kryesisht nga elementi politik maqedonas, ai që ka në dorë shumëçka në vendimarrje.
Në fakt, nga i pari, pushteti nuk është se ka ndonjë ofertë tunduese. Nikolla Gruevksi nuk a ka fshehur prirjen e tij nacionaliste dhe ka propozuar krijimin e një qeverie mono-etnike, pra “heqjen qafe” të shqiparëve dhe koalicionit me ta.
Ndërsa Zaev nga kampi opozitar është treguar shumë zemërgjerë dhe mu në pikën më të ndjeshme të shqiptarëve: gjuhën. Javë më parë ai deklaroi se gjuha shqipe të jetë gjuhë zyrtare në shtet pas marrjes së mandatit nga ana e LSDM-së.
Por realiteti flet ndryshe. Zoran Zaev po shfrytëzon shumë rrjetet sociale për të promovuar takimet e tij me qytetarë, ama gjuha shqipe nuk figuron askund. Në gjuhë shqipe nuk janë as videot e shpërndara me promovimin e vizionit qeverisës, si dhe as pjesë nga programi i partisë së tij.
Po ashtu, kujtojmë se në shtabin zgjedhor në Çair të Shkupit, LSDM e hoqi tërësisht tabelën e venduar ku figuronte edhe gjuha shqipe, duke e quajtur si të jashtëligjshme dhe provokim.
Nuk dihet se çdo të ndodhë në ditët e ardhshme me opozitën maqedonase, atëherë kur të vlojë dhe fushata, por sinjalet e para karshi politikave paqtuese me shqiptarët nuk janë shpresëdhënëse.
“Shqipja e ëmbël elekorale” e Zaevit, ende nuk po vërtetohet prej tij në realitet. /tesheshi.com/
