Ndonëse me lëndime të rënda në kokë dhe trup pas sulmeve të dhunshme në Kuvend, lideri i LSDM-së, Zoran Zaev vazhdon paraqitjet e tij në media, sidomos duke promovuar hapat e ardhshëm për formimin e qeverisë së re.
Ai në emisionin “Click Plus” të Tv21 ka shprehur dëshirën që të gjitha partitë parlamentare nënshkruese për mandatim të tij për formim të qeverisë së re të jenë pjesë kabinetit.
“Kemi 67 nënshkrime të dhëna për mandatin tim për formim të qeverisë. Dëshiroj dhe pres që të gjitha partitë të jenë të gatshme për të qenë pjesë e saj, ku përveç BDI-së dhe Aleancës të ishte dhe BESA. Kështu unë pres që këto parti të më propozojnë emra për pozita të caktuara në qeveri”, tha Zaev.
Sipas tij, qeveria e mandatuar nga 67 deputetë do të ishte më komforte dhe më stabile se ajo e mandatuar nga 62 aq sa janë të deklaruar për momentin. /tesheshi.com/
