Në gjykatën penale të Shkupit, e hëna do të sjellë në të njëtjtën kohë për gjykim, kryeministrin e Maqedonisë Zoran Zaev dhe ish- kryeministrin, liderin e VMRO-DPMNE-së opozitare, Nikolla Gruevski.
Zoran Zaev do të përgjigjet për rastin “ryshfeti” në Gjykatën Penale të Shkupit. Ai akuzohet se ka kërkuar ryshfet prej rreth 160 mijë euro nga një biznesmen nga Strumica për privatizimin e një trualli. Për veprën penale për të cilën akuzohet shefi i qeverisë së Shkupit, në Kodin Penal parashikohet një dënim me burg me të paktën 5 vjet.
Përveç Zaevit, në gjykatën Penale të Shkupit, nesër mbahet edhe seanca për rastin “shuplakat” ku akuzohet Nikolla Gruevski, kryetar i VMRO-DPMNE-së opozitare, pararendës i tij në qeveri.
Nëse Gjykata Penale në Shkup e vërteton fajësinë për rastin “shuplakat në Komunën Qendër”, atëherë ish-kryeministri Gruevski mund të dënohet nga 6 deri në 5 vjet burg. Ndaj Gruevskit dhe 14 personave të tjerë prej nesër pritet përballja në procesin gjyqësor për rastin “shuplakat”.
Për rastin “shuplaka”, ka dalë një audio-regjistrim nga “bombat e Zaevit” ku dëgjohet sesi Gruevski kërkon që të përgatitet skenari ku kryetari i komunës Qendër nga radhët e LSDM-së së Zaevit, Andrej Zhernovski do t’i marrë disa shuplaka, nën pretekstin për mosprishjen e Kishës së re.
Përveç “shuplakave”, Gruevski është i dyshuar edhe për 3 raste të tjera: “tanku” për blerjen e Mercedesit prej 600 mijë euro, “trajektorja”, që ka të bëjë me procedurën për autostradat dhe “Titanik”, ku dënimi i përgjithshëm më i ulët është 9 vjet. /tesheshi.com/
