Ylli Pango, një emër publik me dritëhijet e veta, rrëfeu momentin e vështirë të jetë së tij të pak viteve më parë, kur iu realizua një kamerë e fshehtë, transmetuar nga Fiks-i, të cilin ai e hodhi në gjyq.
Ai tha se mundi ta kapërcejë atë moment të vështirë, i cili i solli dhe fundin e një karriere të shkurtër politike në PD, pasi atë kohë ishte dhe ministër Kulture, duke u shkarkuar menjëherë nga Berisha.
“Ishte komplet intrigë, është diçka që e kam flakur, e kam hedhur pas me përbuzje. 24-orëshin e parë kam qenë i trullosur, se nuk e konceptoja dot që kjo do bëhej ngjarje, ishte aq e sajuar, aq qesharake, në asnjë vend të botës s’mund të bëhej. Pas një dite jam ngritur në këmbë dhe kam filluar luftën, kam qenë unë paditësi.
Unë këtë luftë e quaj të fituar se kam vazhduar të botoj libra, kam rikrijuar familje, kam bërë fëmijë tjetër, kam udhëtuar në gjithë botën dhe unë se njoh fjalën ‘pension’ e ‘lodhje’, se përqafova jetën dhe vazhdova fuqishëm të jetoj.
Nuk pata asnjë moment deprimimi, ndërkohë që në ngjarje të tilla shumë njerëz janë vrarë, janë shkatërruar, kanë humbur nëpër botë, por nuk është faji tyre, nuk trajtohet njeriu kështu”, rrëfeu Pango, një pedagog i njohur i psikologjisë, por dhe i matematikës, një rast unik ky.
Kujtojmë se Pango u përfshi në KOP në 2005-ën, ku fitoi dhe një mandat deputeti në përballje me Anastas Angjelin.
Pangos iu trasmetua një skenë nga banesa e tij, ku aludohej se po tentonte të abuzonte seksualisht me një studente. Kryefjalë e asaj skenë ishte “mbërthecka”.
Goditja shkoi në sinkron me perceptimin publik ndaj tij si njeri me prirje lapërdhare. /tesheshi.com/
