Xhudo kosovare vazhdon të pasurohet me medalje. Edhe pse në mungesë të Majlina Kelmendit, në “grad slamin” e Parisit ka arritur të marrë një të artë dhe një të bronztë.
Xhudisti Akil Gjakova e ka fituar të artën të shtunën pasdite deri në 73 kilogramë pasi e mundi xhudistin nga Gjeorgjia, Lasha Shavdatuashvili, duke shënuar kështu suksesin më të madh të Kosovës në xhudon e meshkujve.
Në gjysmëfinale xhudisti kosovar e mposhti atë nga Mongolia, Tsend Ochir.
Triumfit të Akilit i është gëzuar jashtëzkonisht shumë trajneri Driton Kuka. Ai përmes një postimi në Facebook ka thënë se kjo është dhurata e ekipit të tij për dhjetë vjetorin e Pavarësisë së Kosovës.
“Mbreti i Parisit që flet shqip sonte. Dhurata për 10 vjet shtet. Akili i artë në Grand Slam Paris. Kampioni Olimpik i gjunjëzuar në finale”, shkruan Kuka.
Distria e bronztë…
Ndërkohë xhudistja, Distria Krasniqi e ka fituar medaljen e bronztë në kategorinë deri 52 kilogramë.
Fatkeqësisht, Nora Gjakova humbi në rundin e dytë dhe u eliminua duke mbetur pa medalje. /tesheshi.com/
