Evropa aktualisht po vuan nga një valë ekstreme e të nxehtit, me temperatura që i kalojnë 40 gradë Celsius në shumë vende.
Në Itali, Ministria e Shëndetësisë shpalli alarmin e kuq të kategorisë së tretë për sot për 13 qytete të mëdha, përfshirë Romën, Bolonjën, Firencen, Palermon dhe Triesten/
Autoritetet lokale në shumë rajone kanë marrë masa urgjente, si ndalimi i punës në natyrë nga ora 12:30 deri në 16:00 me orën lokale për punëtorët e bujqësisë dhe ndërtimit. Qytetarët këshillohen të shmangin ekspozimin direkt në diell dhe të rrisin marrjen e lëngjeve.
Në Greqi, Shërbimi Meteorologjik Kombëtar (EMY) njoftoi se masat ajrore jashtëzakonisht të nxehta që mbulojnë pjesën më të madhe të Evropës Lindore dhe Ballkanit do të vazhdojnë të prekin të gjithë vendin, ndërsa temperaturat pritet të arrijnë kulmin ditët në vijim.
Temperaturat parashikohen të arrijnë në 43 gradë Celsius në pjesët veriore të Greqisë dhe 41 deri në 42 gradë në Greqinë qendrore dhe perëndimore.
Në Bullgari, Instituti Kombëtar i Meteorologjisë dhe Hidrologjisë (NIMH) parashikon temperatura midis 38 dhe 43 gradë në pjesën më të madhe të vendit, me përjashtim të provincave të Detit të Zi.
Alarmi i kuq
Administrata Kombëtare Meteorologjike e Rumanisë (ANM) ka lëshuar një paralajmërim të kuq për nxehtësinë ekstreme që ka goditur pjesën më të madhe të vendit, me temperatura që variojnë nga 37 në 42 gradë.
Një anticiklon afrikan që po intensifikohet mbi gjerësinë gjeografike të Mesdheut po prek edhe Shqipërinë, ku temperaturat pritet të arrijnë maksimalisht deri në 43 gradë në zonat më të ulëta.
Në Maqedoninë e Veriut temperaturat pritet të arrijnë deri në 42 gradë, njofton agjencia shtetërore e lajmeve MIA.
Instituti Kombëtar Meteorologjik i Spanjës (AEMET) paralajmëroi për një valë të nxehti, duke thënë: “Ditët më të këqija do të jenë të enjten dhe të premten, përveç në bregdetin e Mesdheut, ku temperaturat do të arrijnë kulmin të shtunën”.
“Temperaturat në vend mund të kalojnë 44 gradë Celsius. Netët do të jenë jashtëzakonisht të ngrohta”, thuhet në deklaratë. /tesheshi.com/
