Lajmi i dhënë ditë më parë për një person të quajtur Fatjon Habibi nga Saranda, i cili kishte terrorizuar jetimoren e këtij qyteti duke thirrur “Allahu Ekber” e duke u vetëshpallur si pjesëtar i ISIS-it, u shoqërua dhe nga e dhëna tjetër se ai falej në xhaminë e Xhermëhallës në Delvinë; në një tjetër variant ai stërvitej aty.
Tesheshi.com u sjell foto të xhamisë në fjalë, e cila nuk funksionon prej dekadash, e që është një rrënojë e gjallë sa tërheq vetëm individë të dhënë pas trashëgimisë. Pra, bie tërësisht versioni që Fatjon Habibi të jetë falur aty.
Por dhe tjetri që ai është stërvitur aty nuk ka asnjë sens, pasi jo domosdo njeriu duhet të stërvitet në një vend objekt kulti. Xhamitë, qoftë ato aktive apo qoftë dhe ato muzeale, nuk posedojnë shkallë suedeze, paralale, kaluç, jastëk boksi apo gira, ndërkohë që personi në fjalë vuan nga obeziteti.
Ditët që pasuan lajmin e kërcënimit të tij, sqaruan dhe faktin se ai vuan nga probleme mendore.
Xhermëhalla është një lagje e vjetër e Delvinës, ose më saktë aty ku dikur ishte Delvina si kasaba. Aty ndodhet një kompleks që përfshin xhaminë, një medrese, një hamam dhe një burim uji. Kompleksi është monument trashëgimie, ku vitet e fundit ka qenë nën vëzhgimin e afërt të departamentit të Arkeologjisë në Universitetin e Venecias, që përgatiti dhe një projekt konservimi dhe restaurimi. /tesheshi.com/
