Ish-ministri socialist Fatmir Xhafaj ka qenë tejet kritik ndaj zhvillimeve në Parlament, duke mos kursyer as vetë Ramën për gjuhën e ashpër të një ditë më parë ndaj deputetëve demokratë, e thënë se prej aty, në Kuvendi, po buron dhe pesimizmi ndër shqiptarë.
“Në këtë kohë kur kemi realisht një krizë ekonomike të përbotshme, luftë nëpër botë, tensione konflikti, pse jo shkëndija konfrontimi force në Ballkan, kjo mungesë përgjegjëshmërie dhe aftësie për të dialoguar qetësisht për çështje kaq madhore jo thjesht nuk e nderon këtë sallë, por e turpëron para popullit dhe kombit.
Ka shumë arsye pse është kaq e vështirë në këtë legjislaturë të bësh debat të këtij niveli, por një gjë është e sigurtë, kjo sallë dhe cfarë ndodh këtu një nga arsyet kryesore pse ka shifra kaq të larta negativiteti në sondazhet e barometrave të ndryshëm që na ndëshkojnë fort, por dhe pse ka kaq shumë pesimizëm, mosbesim e dëshpërim jashtë saj e veçanërisht te të rinjtë dhe pse një pjesë e tyre vazhdojnë të largohen nga vendi.
Kjo retotrikë e turpshme ca më keq ka dalë dhe jashtë kësaj salle në gjuhë të huaja, në mediat e botës, ku vendi po shënjohet si simbol i shumë të këqijave. Dëm më të madh nuk mund t’i bëhet imazhit të vendit dhe sidomos mijëra shqitparëve që enden rrugëve të botës për një jetë më të mirë. Ne po u japim ëndrrave të tyre, shpresës dhe jetës një ndëshkim të pamerituar që ata e vuajnë shumë më tepër se në që jemi këtu dhe jemi përfshirë në këtë vorbull ethesh pushteti e marrëzie politike,” theksoi Xhafaj, i ndëshkuar pak vite më parë nga një video e sajuar opozitare me shënjestër të vëllanë, më saktë vetë atë.
Ai qe kritik madje dhe për vetë buxhetin e qeverisë që përfaqëson.
“Buxheti i prezantuar duhet pranuar se ka disi risi pozitive. I veçoj këto sepse para se të jetë për të mundurit, buxheti duhet të jetë për të pamundurit, edhe pse natyrshëm kuptohet se ky nuk mund të jetë një buxhet si çdo vit normal. Situata ndërkombëtare imponon masa shtrënguese, pasi lufta po jep efekte kudo.
Situatat duhet ta bëjnë qeverinë më të përulur me komunikuese me grupet e interesit. Bie dakord me disa masa shtrënguese në buxhet, por është absurde që kur flasim për kohë lufte të programojmë shpenzime e investime si në kohë paqeje, që të ketë kuptim edhe shprehja ‘shtri këmbët sa ke jorganin’”, arsyetoi deputeti i socialist, një ndër emrat e lidershipit të PS-së. /tesheshi.com/
