Nga Ankaraja me Erdogan, Rama është shfaqur në Tiranë, aty ku ka hedhur firmën përfundimtare për investimin e madh emiratas në Durrës. Më saktë, pas tre vitesh negociata, është nënshkruar sot Memorandum i Bashkëpunimit për ndërtimin e portit turistik të Durrësit.
Investimi prej 2 mld dollarësh është një bashkëpunim midis “Eagle Hills Real Estate Development” shpk, përfaqësuar nga investitori e zhvilluesi me famë botërore Muhammed El Alabbar dhe “Albanian Seaports Development Company”.
Në fjalën e tij në ceremoni kryeministri Edi Rama tha se ky është investimi më i madh turistik dhe në rajon.
Sipas Ramës, ky investim vjen si rrjedhojë e një sërë hapash.
“Do ishte e paimagjinueshme të kishim një investim të tillë në turizëm, në një vend që nisi të zhvillohej si vend me vizion turistik konkurrues kur ne morëm qeverinë”, tha Rama.
“Bëhet fjalë për një investitor me një reputacion të padiskutueshëm, dhe një vullnet që buron nga një miqësi mes Princit Mohamed Bin Zayed dhe Shqipërisë dhe shqiptarëve.
Mohamed Bin Zayed rikthehet me një shprehje të vullnetit jashtëzakonisht të mirë, duke sjellë këtu investimin që do t’i kalojë 2 miliardë dollarë”, tha Rama, duke shtuar se nga Durrësi do fitojë e gjithë Shqipëria.
“Nuk është çështja e 12 mijë vendeve të reja pune, nuk është për sjelljen e 1000 jahteve, nuk është fjala për hotelet, baret, restorantet, teatrot apo rezidencat që do të ndërtohen aty, as për faktin që me ndërtimin e këtij porti, të rritet vlera e pasurisë së të gjtha qytetarëve të Durrësit se njerëzit do të duan të blejnë e shesin shumë më tepër se do të rritet vlera e pronave në vijë bregdetare. Këtu është fjala për imazhin komplet tjetër që do të ketë Shqipëria turistike në Evropë.
Nëse sot pagat në Malin e Zi janë më të lartat në rajon, është rezultat i një rruge nga Port of Montenegro”, tha Rama.
Nga ana tjetër, investitori e zhvilluesi me famë botërore Muhammed El Alabbar premtoi diçka madhështore, nga
e cila do të mahniten njerëzit e nuk do të duan të largohen.
“Nëse dikush na pyet se për çfarë është e gjitha kjo, është për krijimin e një jete të re.
Ne do të krijojmë diçka që njerëzit kur të vijnë, do të duan të mos largohen kurrë. Këtë jua premtoj”, tha Muhammed El Alabbar. /tesheshi.com/
