Kryeministri i Serbisë, Aleksandër Vuçiç, ka premtuar se qeveria do të ndajë 150 milionë euro për të ndërtuar një stadium kombëtar. Vuçiç e deklaroi këtë pasi priti futbollistët serbë që vinin nga një fitore morale ndaj Shqipërisë, njofton mediumi “b92”.
Pyetjes së futbollistit Nemanja Matiç se kur do ta ketë Serbia një stadium kombëtar, Vuçiç do t’i përgjigjej se është i gatshëm ta ndërtojë një të tillë gjatë tri viteve të ardhshme, aq sa është dhe kohëzgjatja e mandatit të tij.
“Nuk e di nëse do të investojmë në stadiumin e Partizanit apo të Crvena Zvezdës së Beogradit, por do të investojmë në një stadium 150 milion eurosh, që kombëtarja serbe ta ketë një fole. Natyrisht se Federata Serbe e Futbollit duhet të gjejë një zgjidhje për këtë,” tha Vuçiç para gazetarëve.
Vuçiç sqaroi gjithashtu se stadiumi i ri do të duhet të jetë më i miri në rajon, dhe do të ketë një kapacitet prej 50.000 apo 60.000 vendesh. Idenë e ndërtimit të një stadiumi kombëtar e përkrahu edhe presidenti i Federatës Serbe të Futbollit, Tomislav Karaxhiç. /tesheshi.com/
