Shqipërim Arifi, kreu i Komunës së Preshevës, njofton në FB shkarkimin e tij nga ky post prej presidentit serb Vuçiç.
“Dje në mesnatë, pushteti autoritar i Beogradit, në mënyrë arbitrare dhe duke mos ndjekur asnjë procedurë ligjore, si dhe pa asnjë njoftim zyrtar, regjimi serb dhe antishqiptar duke vazhduar traditën e Millosheviqit të viteve të 90-ta, në mënyrë të dhunshme më shkarkuan nga posti i Kryetarit të Komunës së Preshevës. Njëkohësisht, ky regjim antishqiptar dhunshëm instaloi një organ të përkohshëm deri në zgjedhjet e ardhshme”, shkruan ky politikan i ri në Luginë.
Arifi vijon duke shkruar se “ka disa kohë që Vuçiç kërcënon publikisht shqiptarët e Luginës së Preshevës. Shkarkimi i dhunshëm i imi, mesnatën e mbrëmshme, pa asnjë procedur ligjore dhe asnjë njoftim, ndodh menjëherë pas kërcënimit të fundit publik të Vuçiçit në këtë javë dhe 24 orë pasi u dënova nga Gjykata serbe për vendosjen e flamurit kombëtar shqiptar më 28 Nëntor.
Me këto veprime raciste antishqiptare që janë trashëgimi e politikave të regjimit të Millosheviçit, Serbia e sotshme e Vuçiçit dëshmon tani më tre dekada e më shumë se shqiptarët nuk i konsideron si qenie njerëzore dhe asesi qyetatarë të barabartë në Serbi. Diskriminimi ndaj shqiptarëve është agjendë e pandërprerë e politikave të Vuçiçit dhe Serbisë së tij pro-ruse”.
Por më rëndë akoma, Arifi akuzon disa emra të njohur të politikës në Luginë, deri dhe deputetin Shaip Kamberi, që sipas tij kanë ndihmuar Vuçiçin në shkarkimin e tij si kryekomunar.
“Shkarkimin tim të dhunshëm nuk kishte mundur ta realizojë pa ndihmën e pakursyer të shqipfolësve serbofilë siç janë: Ragmi Mustafa, Shaip Kamberi, Ardita Sinani dhe Argjend Sherifi, si dhe disa kompani lokale mafioze që bashkëpunojnë me qarqet e errëta në Serbi. Kjo klasë politike bashkëpunuese besnik të regjimit serb me dekada, janë bërë vegël e lehtë për Vuçiçin dhe serbinë për të realizuar agjendën e tij antishqiptare në Luginë të Preshevës.
Prandaj edhe kryetari i organit të dhunshëm që u vendos në mesnatën e djeshme nga Vuçiç, është Ragmi Mustafa i cili para një dekade i ka dhuruar pikërisht Vuçiçit “Zahvallnicën” – Mirënjohje” menjëherë pasi e hoqi Vuçiç lapidarin me emrat e dëshmorëve të UÇPMB-së”, shkruan ndër të tjera Shqipëri Arifi, një shqiptar nga Lugina që la Gjermaninë, aty ku u rrit dhe shkollua, për të qeverisur vendlindjen e tij. /tesheshi.com/
