Udhëheqësi në mërgim i opozitës së Taxhikistanit, Umarali Kuvatov, 47 vjeç, u vra në Stamboll të enjten në mbrëmje vonë.
Bëhet e ditur se Kuvatov-i, udhëheqësi i lëvizjes opozitare “Grupi 24”, u vra ndërsa po ecte në këmbë në rrugët e Fatihut, një lagje e Stambollit, pak pasi doli nga shtëpia. Ngjarja ndodhi në 22:30 me orën lokale. Një dëshmitar tregoi se një person iu afrua të ndjerit dhe e qëlloi vetëm një herë me plumb në kokë. Vrasësi iku me të shpejtë, pa mundur të kapej.
Opozitari taxhikistanas kishte pritur një mik atë mbrëmje në shtëpi, dhe i helmuar nga ushqimi, siç duket një tentativë e parë për ta eliminuar, kishte dalë për të vajtur në spital. Miku i tij, po ashtu, u zhduk pas ngjarjes pa lënë gjurmë, duke hedhur dyshime për një plan të kurdisur mirë.
Lëvizja opozitare e Kuvatov-it, “Grupi 24”, është nxjerrë jashtë ligjit në Taxhikistan tetorin e shkuar nga Gjykata e Lartë si një “organizatë ekstremiste”. Vendimi erdhi pasi grupi opozitar bëri thirrje në rrjetet sociale për lëvizje antiqeveritare. /tesheshi.com/
