Megjithëse presidenti rus Vladimir Putin refuzon me kokfortësi pasojat ekonomike të sanksioneve perëndimore ndaj ekonomisë ruse, praktikisht ai po merr masat për ta përballuar krizën, ose më mirë me thënë po i vuan pasojat. A mos është nisja e një diete si kjo më poshtë tregues i kësaj?!
Vladimir Putin njoftoi dje se do të reduktojë pagën e tij dhe pagat e disa zyrtarëve të lartë rusë me 10%. Vendimi vjen në një kohë kur ekonomia ruse po kalon vështirësi ekonomike si rezultat i rënies së vlerës së rublës, rënia e çmimeve të naftës dhe si pasojë e sanksioneve perëndimore të vëna ndaj Moskës.
Sipas një dekreti të nënshkruar nga Putini, rroga e tij dhe pagat e kryeministrit Dimitri Medvedev, të Prokurorit të Përgjithshëm Yuri Chaika dhe kreut të hetimit, Alexander Bastrykin, do të shkurtohen me 10% duke filluar nga ky muaj deri në fund të vitit. Po kështu kjo masë do të aplikohet edhe mbi pagat e të gjithë nënpunësve të presidencës dhe qeverisë.
Një zëdhënës për dhomën e ulët të parlamentit rus (Duma), Laurie Shuvalov, tha se shkurtimet do të përfshijnë edhe pagat e deputetëve gjithashtu.
Kremlini lëshoi një dekret në prill 2014 për rritjen e pagës së Presidentit Putin tri herë, ndërkohë që rroga e tij në 2013 ishte më e ulët se ajo e ministrave.
Burimi: Le France
