Policia ka mundur të bjerë në gjurmën e autorit të dyshuar të vrasjes së dyfishtë në Lezhë, në zonën e thellë Lalm Lukaj, ku mbetën të vrarë Kol Murrani dhe Preng Simoni, i pari rapsod i njohur i zonës e tjetri mik i tij.
Bëhet fjalë për shetasin Aleksandër Perdoda, i cili është arrestuar nga policia dhe është shpallur në kërkim vëllai i tij, për përkrahje të krimit.
Policia tha në një deklaratë se “si rezultat i veprimeve të shpejta profesionale dhe hetimore, u bë i mundur sigurimi i provave për autorin e dyshuar të kësaj ngjarjeje, shtetasi A. P., 40 vjeç, banues në Lalm, Lezhë, person me precedent kriminal në fushën e krimeve ndaj personit.
Bazuar në prova të arsyeshme, Policia bëri kapjen dhe shoqërimin e shtetasit A. P. dhe në përfundim të veprimeve u bë ndalimi i këtij shtetasi, për veprën penale “Vrasja”.
Po në lidhje më këtë ngjarje është shpallur në kërkim edhe vëllai i autorit të dyshuar, shtetasi E. P., i cili dyshohet se ka ndihmuar të vëllanë për fshehjen e provave.
Nga tërësia e veprimeve dyshohet se ky shtetas i ka qëlluar me armë për arsye pronësie, pasi pretendon se pjesa ku ka ndodhur krimi është pronë e tij”.
Në anën tjetër, nuk ka ende asnjë të dyshuar për vrasjen tjetër makabre, atë të Durrësit, ku u ekzekutuan dy vëllezër, Besmir dhe Viktor Haxhia.
Të dy ngjarjet ndodhën në kohë të afërt me njëra-tjetrën, pasditen e të hënës. /tesheshi.com/
