Kërkesa e bërë nga presidenti aktual Hashim Thaçi për zbardhjen e vrasjeve të gjatë dhe pasluftës, si dhe atentati ndaj presidentit të ndjerë Ibrahim Rugova, ditëve të fundit vazhdon të jetë top-temë në Kosovë. Por, ajo që çoi pluhur më shumë është një deklaratë e dhënë së fundmi nga Thaçi në një prej emisioneve televizive kosovare ku atentatin e lidhi me atë se në atë kohë është paraparë ndërtimi i koalicionit të madh LDK-PDK, e sipas Thaçit kjo dikujt i pengoi. Por Naser Rugova, ish-deputet njëherit familjar i presidentit të ndjerë, thotë se kurrë nuk ka dëgjuar se do të prishej koalicioni me AAK-në dhe do të ndërtohej me PDK-në. Ish-deputeti Rugova, në një intervistë për tesheshi.com flet edhe për letrat e Thaçit dërguar Prokurorisë, si dhe tregon se çfarë ka thënë Rugova pas vrasjes së këshilltarit të tij Xhemajl Mustafa…
Intervistoi: Blendi Gashi
Rugova, së fundmi është riaktualiuar tema e vrasjeve të gjatë dhe pasluftës. Si i shihni dërgimin e 4 letrave nga ana e kryeministrit në Prokurorinë e Shtetit?
Vlerësoj se vrasjet gjatë viteve ‘98 – ‘2002 ku u ekzekutuan shumë intelektualë, veprimtarë, komandatë të shquar dhe strategë ushtarak që kishin dhënë shumë për lirinë dhe pavarësinë e Kosovës, janë ngjarje që e kanë dëmtuar shumë Kosovën, përspektivën e saj por dhe imazhin, pa fplur për dhimbjen e madhe të familjeve të këtyre patriotëve. Presidenti aktual është dashur të deklarohet më herët për këtë plagë që ka përmasa nacionale, sidomos pas shpalljes së pavarësisë, sepse ka qenë për tetë vite udhëheqës dhe pjesë e qeverisë. Dërgimi i këtyre letrave në prokurori është më tepër show medial dhe sipas meje një demagogji e radhës.
Një prej kërkesave është edhe zbardhja e atentatit ndaj ish-presidentit të ndjerë, Rugova. Ju si familjar i tij a mund të na thoni atë që dini për atentatin në fjalë? A ju ka thënë diç ish-presidenti juve si familjarë për këtë atentat se kush mund ta ketë bërë?
Atentati ndaj ish-presidentit Rugova ishte një nga ngjarjet më të këqija në prag të shpalljes së pavarësisë. Bëhet fjalë për vitin 2005, kur Kosovën po atë ditë e vizitoi ish-sekretari gjeneral i paktit të NATO-s, Havier Solana. Në këtë kuptim, ajo qën ndodhi ishte një dështim për organet e drejtësisë së Kosovës ose organet e protektoratit. T’i bëhet një atentat në mënyrë aq të sofistikuar Rugovës, me eksploziv me telekomandë dhe tani pothuajse pas 11 viteve të mos ketë ide se cilët ishin autorët, ky vërtet që është dështim i organeve të drejtësisë dhe i sistemit të gjyqësisë në vend. Presidenti Rugova ka qenë institucionalist dhe nuk i ka biseduar temat serioze në rrethe private apo familjare. Ka pasë zëra të ndryshëm rreth kësaj ngjarje, shkrime, spekulime, bile edhe supozime për të cilat është kompetente prokuroria e shtetit.
Sakaq, duke folur për atentatin, presidenti Thaçi shtroi disa pyetje, ku një prej tyre ishte se: “pse ndodhi atentati ndaj Rugovës derisa ai po vinte në takim për të lidhur marrëveshje koalicioni me PDK-në?” Ju a jeni në dijeni nëse është zhvilluar atë kohë një takim Rugova – Thaçi me qëllim lidhjen e një koalicioni me PDK-në, kur dihet se LDK veç bashkëqeveriste me AAK-në?
Presidenti aktual, sigurisht që ka informata pasiqë nga kjo pozitë institucionale ka dërguar letër për këtë temë mjaft serioze, dhe pyetjet dhe supozimet që i ka parashtruar le t’iadreson te prokuroria dhe organet e drejtësisë. Ta hapësh këtë temë tani, në prag të fillimit të veprimit të Gjykatës Speciale, sigurisht që diçka serioze do të lëvizë në këtë drejtim. Presidenti aktual duhet të jetë më konkret në aludimet e tij dhe pyetjet e parashtruara, pasi kjo do i ndihmonte shumë prokurorisë; dhe do isha shumë i lumtur që ky rast të zbardhet dhe që shpata e drejtësisë t’i godasë kriminelët. Presidenti Rugova dhe LDK-ja patën bërë marrëveshje koalicioni me 18 nëntor 2004, një koalicion që pat filluar me një dinamikë pune bukur të intensifikuar. Unë kam qenë për një vit e gjysmë pjesë e atij kabineti qeverisës, kurrë nuk kam dëgjuar se koalicioni me AAK-në do të prishet dhe do të bëhert koalicion me PDK-në. Presidenti Rugova kurrë nuk do bënte koalicion vetëm me PDK-në. Në vitin 2002 ka qenë koalicion i gjërë, të gjitha partitë shqiptare dhe minoritetet. Për të gjallë të presidentit koalicioni LDK – PDK do ishte iluzion.
A keni biseduar ndonjëherë me presidentit e ndjerë për vrasjet e pasluftës së zyrtarëve të lartë të LDK-së? Nëse po, a mund të na tregoni paksa çfarë ju ka thënë? A ka pasur besim se do të zbardhen këto vrasje?
Presidenti Rugova temat institucionale dhe sidomos ato sensitive nuk i ka shtjelluar në sferën familjare apo private. Por mund t’ju them se pas rastit të vrasjes së intelektualit, publicistit dhe këshilltarit të presidentit, Xhemajl Mustafa, kur presidenti i priti në rezidencën e tij babain e Xhemës dhe rreth njëzet burra të Llapit ju tha: “Do bëj çdo gjë që është në kompetencat e mija që kriminelët të dalin para drejtësisë dhe ta marrin dënimin e duhur”. Ka besuar shumë në drejtësinë dhe në zbardhjen e të gjitha vrasjeve politike në Kosovë.
Krejt në fund, ju personalisht kush mendoni se i vrau bashkëpartiakët tuaj dhe besoni në zbardhjen e tyre?
Siç po shifet, fija e lëmshit të krimit është zgjidhur, gjërat po dalin në shesh nga ata që vet ishin pjesë e këtyre krimeve mkabre. Uroj dhe shpresoj që drejtësia do godet fuqishëm mbi këtë farë të fëlliqur! /tesheshi.com/
