Kreu demokrat Basha vizitoi familjen Buci në Kamëz ku një natë më parë, kryefamiljari Agim Buci dhe e shoqja, Merita Buci, u sulmuan nga dy grabitës në marketin e tyre, e ku si pasojë humb i jetën Agimi, 52 vjeç.
“Jam këtu për t’i shprehur ngushëllime familjes Buci, për të ndarë me ta dhimbjen e madhe që është e tyrja por edhe gjithë Shqipërisë”, tha Basha, duke e komentuar më pas rastin politikisht. Sipas tij, një shtet i dorëzuar para krimit ka shtuar pasigurinë e qytetarëve.
“Pasiguria e familjeve shqiptare, pasiguria e biznesit të vogël ka marrë përmasa tronditëse ku në më pak se 4 javë jo vetëm grabitjet janë bërë lajmi i përditshëm, por për fat të keq grabitjet janë shoqëruar me vrasje barbare, siç ishte rasti i mbrëmshëm në Kamzë apo ai në Fier para disa javësh.
Kjo është dëshmi e dorëzimit dhe dështimit të shtetit dhe rendit publik dhe një apel i fortë për të lënë paradat, fjalimet boshe dhe proceset fasadë, sepse nuk ka polici në shërbim të qytetarëve kur kemi ministra në shërbim të kriminelëve”, tha kryedemokrati.
Policia nga ana e saj është vënë që mbrëmë në ndjekje të autorëve, pa mundur ende as t’i kapë, por dhe as identifikojë. /tesheshi.com/
