Vrasja e gjyqtares Fildes Hafizi shkaktoi reagime të shumta, veçanërisht të rradhët e politikës. Kryeministri Edi Rama përmes një komenti në rrjetet sociale shkruan se ata që lotojnë për gjyqtaren, nuk donin as reformën në drejtësi dhe as vettingun. Duket se komenti i Ramës i drejtohet opozitës, e cila në komente të ndryshme ka akuzuar institucionet e shtetit për dështimin në parandalimin e krimit.
Por ndaj mesazhit të Ramës ka reaguar kryetarja e LSI-së, Monika Kryemadhi, sipas të cilës kryeministri tregoi sërish papaërgjegjshmërinë e tij, duke tentuar që fajtorët t’i gjejë larg vetes dhe oborrit të tij.
“I vetëshpalluri “Skënderbe” i kohëve moderne nuk ka as konceptin më të vogël dhe ndjesinë e përgjegjësisë dhe si për çdo ngjarje kërkon fajtorë larg vetes dhe oborrit të tij. Vrajsa e një nëne, gruaje dhe punonjëseje dinjitoze të drejtësisë është këmbana për çdo shtetar të djeshëm dhe të sotëm për të mbajtur përgjegjësitë që na takojnë.
Çdo përpjekje për të larë duart si Pontius Pilate është tregues i qartë i dështimit të qeverisë nga një burrë që thellë në ndërgjegjje ka ndoshta dobësite e tij për dhunën ndaj grave”, shkruan Kryemadhi. /tesheshi.com/
