Fadil Kasemi, 53-vjeçari që tre ditë më parë, qëlloi për vdekje mbi ish-bashkëshorten e tij, nënën e dy fëmijëve, Fildes Hafizin, me profesionin gjykatëse, u përball sot me togat e zeza për t´u njohur me masën e sigurisë.
Gjykata sigurisht që vendosi burg pa afat, ndërsa për 53-vjeçarin prokuroria ka ngritur 3 akuza të rënda: vrasje, armëmmbajtje pa leje dhe rrëmbim.
Fadil Kasemi është paraqitur para gjykatës me një veshje krejt tjetër nga ajo që kreu krimin, ku ishte me pantallona të shkurtra. Por vetëm kaq! Ai nuk shprehu pendesë, as kërkoi falje, thjesht dëgjoi vendimin pa reaguar. Në polici ka deklaruar se do të flasë më vonë, pasi gjendja e tij shëndetësore nuk është e mirë.
Tashmë pritet nisja e proçesit gjyqësor, ku ai ose avokati mbrojtës do të japin versionin e tyre. Koha ka treguar se zakonisht në krime të tilla autorët pranojnë krimin, çka i lehtëson 1/3 e dënimit, duke shmangur kështu një burgim të përjetshëm.
Gjithsesi do të jetë proçesi ai që do të vendosë jo vetëm mbi strategjinë që do të ndjekë mbrojtja dhe i pandehuri, por edhe organi i akuzës që ka formuluar 3 akuza, dy prej të cilave të rënda. /tesheshi.com/
