Ministri i Jashtëm saudit, Adel al-Jubeir ripohoi të martën angazhimin e Mbretërisë për një “hetim gjithëpërfshirës” në vrasjen e gazetarit saudit Jamal Khashoggi në Turqi.
Arabia Saudite ka dërguar një ekip në Turqi dhe të gjithë ata që ishin përgjegjës për vdekjen e gazetarit do të ndaleshin – tha ministri në një konferencë shtypi në Indonezi.
Jubeir tha se “do të ndërmerren masa të nevojshme për të siguruar që ajo që ndodhi nuk përsëritet”.
Ndërsa Këshilltari i Shtëpisë së Bardhë, Jared Kushner, tha se administrata Trump është ende në fazën e gjetjes së fakteve para se t’i kërkohet llogari Arabisë Saudite lidhur me të ndjerin Jamal Khashoggi.
Kushner tha se SHBA është duke u përpjekur të ballafaqohet me faktet dhe se Riadi është një partner dhe aleat i rëndësishëm.
Ai gjithashtu tha se Princi i Kurorës saudite “do të jetë transparent pasi e ka marrë situatën shumë seriozisht”.
I pyetur për kredibilitetin e hetimit saudit për vrasjen e ndodhur në konsullatën e Stambollit, Kushner i tha CNN: “Ne po marrim fakte nga disa vende”. /tesheshi.com/
