Paul H., 27-vjeçari gjerman që goditi dje me thikë katër persona në një stacion treni afër Mynihut, njëri prej të cilëve vdiq në spital, nuk është terrorist, ashtu siç u pretendua me të ndodhur ngjarja.
Ai është paraqitur sot në një seancë gjyqësore, ku një ekspert ka deklaruar se i ndaluari nga policia është i sëmurë mendërisht, e se mund të jetë vetëm pjesërisht përgjegjës për veprimet e tij. Pas kësaj, autori i ngjarjes së djeshme është dërguar në një spital psikiatrik.
Një i papunë prej dy vitesh, hetuesit thonë se ai ka marrë së fundi trajtim mjekësor, e se nuk ka shenja radikalizimi.
Nga prokuroria gjermane deklarojnë se akuzat për vrasje dhe për vrasje në tentativë ndaj tij mund të ndryshojnë nëse rast se ai shpallet jo i përgjegjshëm penalisht.
Një deklaratë e përbashkët e policisë dhe e prokurorisë pas seancës së sotme në gjykatë thotë se, “Një vlerësim paraprak nga eksperti mjekësor ka nxjerrë se i dyshuari ka një sëmundje mendore, e se ka arsye të fortë për të besuar se i kreu aktet në një gjendje çekuilibri mendor.”
Gjyshërit e personit, të cilit i jepet vetëm emri i shkurtuar, Paul H., këmbëngulin se ai nuk është terrorist, e se vuan nga probleme mendore.
Një 56-vjeçar vdiq në spital, e tre të tjerë u plagosën, pas sulmit të djeshëm me thikë në stacionin e trenit pranë Mynihut. Në informimet e para mediatike, akti u përshkrua si terrorist, me motive islamiste, për të rezultuar krejt ndryshe jo shumë orë më vonë. /tesheshi.com/
