Gonzalo Higuain, sulmuesi dhe lojtari më i rëndësishëm i skuadrës napolitane, nuk ndalet së shënuari. Argjentinasi nuk ka munguar të jetë mes golashënuesve në gjashtë takimet e fundit të Napolit, duke barazuar kështu rekordin e vënë nga bashkëkombasi i tij, Diego Armando Maradona, në vitin e largët 1988.
Shpërthyes si gjithnjë, Higuain ka arritur në shifrën e 24 golave në këtë sezon, duke u shënuar të gjitha skuadrave, e duke qenë një ndër kandidatët kryesorë në Europë për të fituar Këpucën e Artë.
Higuain kaloi te Napoli tre vite më parë, në sezonin 2013-2014, pasi u largua nga Reali i Madridit. Paraqitjet e tij kanë qenë gjithmonë në rritje, me 17 gola të shënuar në vitin e tij të parë në Itali, 18 në sezonin e shkuar, e tashmë me 24 të tillë të realizuar kur ka ende shumë javë përpara.
Goli i tij i fundit ndaj Karpit qe me mjaft peshë, duke patur vlerën e tre pikëve për Napolin në ndeshjen e fituar 1-0. Napoli vazhdon ta udhëheqë kampionatin italian, me synimin e vetëm për të fituar titullin.
Këtë të shtunë vjen dhe provimi i vërtetë për Napolin. Në Torino e pret sfida me Juventusin, më vendimtarja e këtij kampionati. /tesheshi.com/
