Seanca e sotme e Kuvendit pritet të testojë mazhorancën, pasi në axhendë është vendosur votimi për 7 ligjet e reformës në Drejtësi, të cilat kërkojnë 84 vota. Votimi i parë i 7 nga 27 ligjet e paketës, duket se do të vendosë në provë fuqinë e koalicionit, por edhe aleancat fluide që mund të krijohen e që nuk kanë qenë të rralla në historinë parlamentare shqiptare.
Opozita nuk pritet të jetë e pranishme në Kuvend, të cilin e ka bojkotuar prej 41 ditësh duke vazhduar protestën e saj përpara Kryeministrisë me kërkesën për qeveri teknike për zgjedhjet e lira.
Të hënën e kaluar në mbledhjen e grupit parlamentar të PS-së, Gramoz Ruçi kërkoi nga deputetët të jenë të pranishëm në seancën parlamentare të së enjtes për të votuar ligjet e reformës në drejtësi.
Për t’u votuar në parlament janë dy kode të rëndësishme si Kodi i Procedurës Penale dhe Kodi Penal, për të cilët duhet një shumicë prej 84 votash.
Këto ligje kushtëzohen edhe me mbështetjen e Lëvizjes Socialiste për Integrim, kundërshtitë për nene të caktuara të tyre, mësohet se janë diskutuar edhe në mbledhjen e deputetëve socialistë të së hënës. /tesheshi.com/
