Ministri në hije i emigracionit nga partia Laburiste, Keir Starmer, premtoi se “lufta do të vijojë” për të detyruar Britaninë e Madhe të bëjë më shumë për të ndihmuar me mijëra fëmijë refugjatë të pashoqëruar që kanë mbetur të bllokuar në Europën kontinentale.
Në votimin e mbajtur gjatë natës në parlament, qeveria mposhti ngushtë amendamentin e laburistëve ndaj ligjit të emigracionit, që do të bënte që vendi të pranonte 3 mijë fëmijë refugjatë.
Por duke folur për mediat, Starmer tha: “Ne nuk mund t’u kthejmë shpinën atyre fëmijëve në gjendje të vështirë në Europë, dhe historia do të na gjykojë për këtë”. Ai shtoi se lufta nuk ka marrë fund. Laburisti reagoi me zemërim edhe ndaj sugjerimit të disa kundërshtarëve politikë se propozimi për të pranuar fëmijët që ndodhet në Europë mund të krijojë një faktor “nxitës” për të tjerët.
Ndërkaq, autoritetet britanikë thanë gjatë debatit në parlament se qeveria nuk mund të mbështesë një politikë e cila “mund të krijojë një situatë ku familjet e shohin si avantazh dërgimin përpara të fëmijëve të tyre të pashoqëruar, duke i lënë në duart e trafikantëve, duke u vendosur jetën në rrezik në përpjekjen e tmerrshme për të kaluar detin drejt Europës e që mund të sjellë pasoja nga më të pabesueshmet”.
Por laburistët këmbëngulin se ajo që thotë qeveria është se këta fëmijë duhen lënë në mëshirën e fatit, e nëse bëhet diçka për ta, të tjerë do të ndjekin shembullin e tyre. “Nuk jam i përgatitur të marr këtë pozicion”, tha Starmer.
Deputetët votuan kundër propozimit me 294 vota ndaj 276 kundër, pasi Home Office arriti të bindë rebelët me më shumë ndikim në radhët e konservatotëve se po bënte mjaftueshëm për të ndihmuar fëmijët refugjatë në Siri dhe në vendet fqinje. Amendamenti u mbështet nga laburistët, dhe disa parti të vogla.
Vetëm disa deputetë konservatorë votuan në favor të pranimit të fëmijëve refugjatë. Një prej këtyre, Tania Mathias, tha se pranimi i fëmijëve që ndodhen në rrezik në Europë ishte gjëja e duhur.
Pas refuzimit të amendamenteve, laburistët kanë hartuar me shpejtësi një propozim alternative që do të shqyrtohet nga Dhoma e Lordëve. Në vend të referimit ndaj një numri të caktuar refugjatësh, amendamenti i ri përpiqet të shkatërrojë pretendimin e qeverisë për ndikimin financiar duke mos e caktuar sa do të pranohen, e duka ia lënë këtë vendim qeverisë në konsultim me autoritetet lokale.
Yvette Cooper, kryetare e task-forcës për refugjatët në partinë Laburiste apeloi konservatorët të votojnë propozimin. Pas debatit ajo tha se është tepër e zhgënjyer nga qëndrimi i parlamentit. “Me mijëra fëmijë janë duke fjetur jashtë në Europë sonte, të pambrojtur ndaj shfrytëzimit dhe abuzimeve e Britania nuk duhet t’u kthejë shpinën”.
Një adoleshent refugjat nga Siria që u takua me laburistët për një aktivitet jashtë parlamentit argumentoi se qeveria nuk ka të drejtë në pretendimin se i ndihmon më mirë fëmijët refugjatë në rajon.
Minoreni udhëtoi përmes 17 shteteve nga Siria deri sa mbërriti në Kale e më pas në Britani. Përmes një përkthyesi ai tha: “Pjesa më e madhe e fëmijëve në kampe i kanë familjet dhe prindërit, por ata që janë të bllokuar në Europë dhe në Kale janë shumë të pambrojtur për shkak se njerëz të tjerë mund t’i bëjnë keq. Ky është ndryshimi thelbësor mes fëmijëve në Europë dhe atyre në kampe.
Të paktën, 95,000 fëmijë të pashoqëruar vlerësohet se kanë aplikuar për azil në Europë, vitin e kaluar.
Agjencia e shërbimeve të inteligjencës së BE-së, Eruopol në janar tha se 10 mijë fëmijë të pashoqëruar janë zhdukur pasi kanë mbërritur në Europë duke paralajmëruar se shumë prej tyre janë bërë pre e bandave kriminale.
Javën e kaluar, ministria e brendshme britanike njoftoi se do të jepte mbështetje për 3 mijë fëmijë refugjatë në kampet e Lindjes së Mesme, por Save the Children dhe organizata të tjera vlerësuan se premtimi është thjesht një përsëritje e njoftimeve për ndihmë dhe se qeveria nuk po arrin të ofrojë ndhmë për fëmijët që kanë mbetur pa mbështetje në Europë.
Por, deklaratat e qeverisë duket se ka bindur disa deputetë konservatorë që ishin shprehur të shqetësuar për këtë çështje.
Përgatiti: Juli Prifti – /tesheshi.com/
