Në një numër qytetesh italiane votohet sot në raundin e dytë në zgjedhjet lokale. Vëmendja është përqendruar në kryeqytetin e vendit, ku balotazhi ka shumë gjasa të nxjerrë një kryebashkiake, e cila do të bëhej e para femër që do ta qeveriste Romën.
Juristja 37-vjeçare Virginia Raggi shihet si favorite ndaj kundërshtarit të saj, Roberto Giachetti. Ajo mori 35 për qind të votave dy javë të shkuara, në raundin e parë të zgjedhjeve vendore, përkundër 24 për qind të votave që siguroi kundërshtari i saj.
Raggi është në këto zgjedhje si përfaqësuese e Lëvizjes Pesë Yjet, të krijuar nga komediani Beppe Grillo në vitin 2009.
“Ne po jemi dëshmitarë të një momenti historik,” do të deklaronte ajo pas votimeve të 5 qershorit.
Roma është pa kryebashkiak që prej tetorit të vitit të shkuar, kur Ignazio Marino i Partisë Demokratike u dorëhoq.
Roberto Giachetti i përket gjithashtu së njëjtës parti, të qendrës së majtë, dhe humbja e tij do të ishte një goditje e madhe për kryeministrin italian, Matteo Renzi.
Në Milano, në të njëjtën kohë, votimet mund të sjellin një humbje për Partinë Demokratike të Renzi-t, ndërsa gara është shumë e fortë dhe Torino e Bolonja. /tesheshi.com/
