Zgjedhjet e sotme në bashkinë e Dibrës kanë hyrë në aktin final, që është tashmë votimi dhe nxjerrja e rezultatit.
Për më shumë se dy muaj, Bashkia Dibër u kthye në arenë të politikës shqiptare, ku u zhvendosën e u përplasën të mëdhenjtë.
Qëllimi për të përfituar politikisht nga rezultati për kreun e një njësie vendore në veri të vendit ka bërë që opozita dhe mazhoranca të harxhojnë të gjitha arsenalet, të ligjshëm dhe paligjshëm që kontrollojnë.
Por zgjedhjet e pjesshme që janë zhvilluar në Shqipëri gjithë këto 25 vite kanë një histori të çuditshme.
Votimet jashtë radhe për deputetë apo për kryetar bashkie a komune, në pjesën më të madhe të tyre, apo gjithmonë, janë fituar nga pushteti i radhës.
Duke qenë se në këtë rast qeveria e ka më të lehtë të derdhë paratë dhe të mirat materiale në një zonë të vetme, edhe banorët e këtyre zonave kanë qenë pragmatistë dhe kanë zgjedhur përfaqësuesin e pushtetit, pasi janë “llastuar” më për së afërmi nga qeveritë, e kësisoj kanë përfituar inverstimet, thasët e miellit apo lekët në dorë për të votuar.
Me një fjalë, në këto zgjedhje të pjesshme kanë pasur më shumë vëmendjen e politikanëve të lartë fare, të cilën nuk e kanë në zgjedhjet e përgjithshme, e ku më së shumti një deputet do të japë premtime.
E në zgjedhjet e pjesshme, banorët e këtyre zonave kanë fatin që vetë kryeministri dhe e gjithë qeveria të shpërngulet tek ata.
E njëjta ka ndodhur edhe në Dibër, ku ministri i Energjitikës, Damian Gjiknuri nuk është kthyer për asnjë ditë në Tiranë, ndërsa Edi Rama ka shkuar 3 herë.
Zgjedhje të pjesshshme në Shqipëri janë zhvilluar disa, por më emblematiket janë pak prej tyre.
Kështu për shembull, në vitin 2002, në Bulqizë u zhvilluan zgjedhjet e pjesshme për deputetë ngaqë parlamentari i sapozgjedhur i PS-së, Ismail Lleshi dha dorëheqjen papritur.
Aty fitoi Ardit Kaja, një drejtues lokal i KESH-it, ndërmarrje që qarkullonte miliona.
Kryeministër në atë kohë ishte Ilir Meta, i cili bëri fushatë të fuqishme tek njerëzit e varfër të Bulqizës. Por duhet thënë se PD-ja nuk zhvilloi përpjekje për ta marrë zonën.
Zgjedhje të tjera të pjesshme emblematike janë ato të vitit 2007 në Mokër të Pogradecit.
Pas vdekjes si pasojë e një aksidenti të deputetit të PD-së, Besnik Jaçelli, u shkua sërish tek kutitë e votimit.
U zhvillua një përpjekje e fortë ndërmjet mazhorancës së asaj kohe, PD-së dhe pozitës së Edi Ramës, që dërgoi si kandidat jo një zyrtar të PS-së, por moderatorin e atëhershëm të emisionit Fiks Fare, Saimir Kodra.
Dhe ndodhi që në fushatë u angazhua thuajse gjithë stafi i Top Channel-it.
Një deputet ishte shumë i rëndësishëm pasi do të ndikonte në zgjedhjen e Presidentit, për të cilin mazhoranca nuk i kishte votat.
Kurse PD-ja kandidoi Erlis Hoxhën, një jurist me reputacion dhe politikan i moderuar.
Në fund fitoi qeveria, qetë fare dhe pa asnjë kokëçarje, duke e detyruar Saimir Kodrën që të kthehet tek Doktori i lënë vetëm në studion e Fiks-it.
Po në kohën e PD-së, nuk arriti që të fitonte as vetë Luan Zhegu, këngëtari i njohur dhe popullor, që i kandiduar nga PS-ja u përball në zgjedhje të pjesshme me Edi Palokën, që sigurisht, gjykuar nga statura publike e hedh në tuç pa asnjë problem politikanin e djathtë me profil ordiner. Por fuqia e pushtetit bëri të vetën.
Tjetër shembull emblematik i zgjedhjeve kur fiton pushteti është edhe vjeshta e vitit 2013, kur pas emërimit të Niko Peleshit si zv.kryeministër, u zhvilluan zgjedhjet e pjesshme për kreun e bashkisë Korçë.
Lulzim Basha sapo ishte zgjedhur në krye të PD-së dhe synoi një rezultat pozitiv për të treguar aksionet e tij politike.
Në Korçë u zhvillua një fushatë e fortë, madje pati akuza edhe për financime studentësh që i sillnin me autobus për të votuar.
Në fund fitoi përfaqësuesi i PS-së.
Po në nëntor të vitit 2013 u zhvilluan zgjedhjet e pjesshme për kreun e komunës së Karbunarës, të cilat sërish u fituan me diferencë të thellë nga PS, pra nga pushteti.
Por sot në Dibër nuk dihet nëse ky rit i pacënuar do vazhdojë, edhe pse doktorët rrallë dalin të humbur në zgjedhje. /tesheshi.com/
