Mjegulla mbi Aeroportin e Prishtinës e ka pamundësuar ardhjen e kryeministrit të Malit të Zi, Dushko Markoviç orën 08:00 ashtu siç ishte paraparë. Ai pritet të mbërrijë për të paktën dy orë me vonesë. Kështu thonë nga qeveria kosovare, me ç’rast njofton se janë në koordinim me palën malazeze gjatë gjithë kohës.
Ai do pritet nga zëvendëskryeministri Behgjet Pacolli dhe ambasadori i Malit të Zi në Kosovë, Ferhat Dinosha dhe ambasadori i Kosovës në Malin e Zi, Skender Durmishi.
Markoviç do të zhvillojë takime edhe me krerët e shtetit ku do të takohet me kryeministrin Ramush Haradinaj, ndërsa pas takimit, do të mbajnë një konferencë për media. Pas takimit me Haradinajn, kryeministri malazez do të takohet edhe me kryeparlamentarin Kadri Veseli.
Kryeministri malazez këtë vizitë do ta zhvillojë në kohën kur liderët politikë janë duke shqyrtuar mundësinë e gjetjes së një zgjidhje për shënjimin e kufirit në mes dy shteteve. /tesheshi.com/
