E ndërsa me ankth vendimi i presidentit Ivanov për dhënien ose jo të mandatit kreut të LSDM-së, Zoran Zaev që të formojë qeverinë e re, VMRO-ja e Gruevskit vijon të ushtrojë presion mbi rivalin politik që mos e ndërmarrë këtë hap duke pranuar kërkesat e Platformës Shqiptare.
Këtë të martë, përmes një komunikate, kjo parti akuzoi Zaevin se nuk ndjen asnjë farë përgjegjësie për mbrojtjen e interesave shtetërore dhe kombëtare. VMRO dhe njëherë i ka bërë ofertë Zaevit që do ketë votat e saj në parlament për t’u votuar si kryeministër, nëse do heq dorë nga pranimi i kushteve shqiptare.
Por mbi të gjitha, i kujtojnë atij se votat e shumicës nuk kanë shkuar për Platformën e ardhur nga Tirana.
“Qytetarët nuk votuan, as për ndryshimin e monedhave, e as për zyrtarizimin e gjuhës shqipe në të gjithë territorin, dhe asesi për krijimin e shtetit binacional ose për federalizimin apo kantonizimin. Qytetarët nuk votuan për platformën nga Tirana. Zaev e pranon gjithë këtë vetëm e vetëm për të ardhur në pushtet pa mbështetjen e popullit”, thuhet në komunikatën e VMRO-së.
Kjo e fundit i kujton opinionit se një akt të ngjashëm LSDM-ja e ka bërë edhe në vitin 2004 me shtyerjen e ligjit për ndarje territoriale. /tesheshi.com/
