Ka reaguar më në fund presidenti Meta ndaj verdiktit të Venecias, i cili e quajti si shkelje të Kushtetutës anullimin e 30 qershorit.
Por dhe në këtë rast, ndonëse se vulën e vë një institucion prestigjoz europian i çështjeve juridike dhe konstitucionale, kreu i shtetit shqiptar ka vendosur ta injorojë, duke reaguar allasoj:
“Si mund t’i trembet Venecias Luani i Artë i Venecias të paktën për këtë vit. Të jeni të sigurtë se Luani i Artë i Venecias për këtë vit do të jetë siç e ka mbajtur premtimin deri më 24 korrik”, ka thënë Meta nga maja e Sari Salltikut në Krujë, duke kremtuar ashuren bektashie.
Tej kësaj ironie, po allasoj, me një këmbëngulje në të tijën, Meta tenton ta rrëzojë poshtë Venecian dhe kur pretendon se ka bërë zero shkelje kushtetuese.
“Kam zero koment (dhe vijon komentin) për këtë çështje sepse e kam shteruar me kohë edhe si president, por edhe si institucion mbrojtjen e shkëlqyer dhe parimore të Kushtetutës, pluralizmit politik, të drejtës së zgjedhjes sipas vetë Këshillit të Europës, Konventes Europaine të të drejtave të Njeriut, sipas detyrimeve të pashmangshme që burojnë nga marrëveshja e Shqipërisë me BE për marrëveshjen e Stabilizim Asocimit, edhe sipas vetë vendimit të qartë që ka marrë Gjykata e Strasburgut për të sqaruar se zgjedhje nuk do të thotë procedurë dhe proces mekanik votimi, pra pa alternativë, por do të thotë mundësi për të ndikuar, për të zgjedhur, zgjedhje në kuptimin substancial. Jemi të qartë për këtë çështje dhe lidhur me idenë e një drafti që ka rrjedhur është gjëja më e parëndësishme”, shprehet Meta, duke iu rikthyer sërish edhe 18 Tetorit të tij të injoruar dhe nga ndërkombëtarët.
“Për presidentin Meta ka vetëm një datë të rëndësishme, data 18, në mënyrë që Shqipëria të ketë mundësi të çelë ecë drejt çeljes së negociatave dhe të plotësojë të gjitha detyrimet që janë të qarta dhe qënuk duhet të shtohen më. Apeli im është që të gjithë të përqëndrohen në zgjidhjen e krizës dhe të marrin shembull nga presidenti në respektimin e Kushtetutës dhe parimeve të saj të cilat janë të shenjta për mua”, tha kreu i shtetit. /tesheshi.com/
