Vjedhësit në Maqedoni nuk duan t’ja dijnë për vendet e shenjta. Policia maqedonase ka njoftuar se ka arrestuar tre persona të mitur nga Koçani të cilët ditë më parë kanë vjedhur kambanat nga kompleksi i Manastirit “Shën Pantelejmon” të fshatit Pantelej të Koçanit.
Objektet e vjedhura, të thyera në copa në dy pjesë, pasi që janë vjedhur nga kisha, janë dërguar në hekurishte në Koçan dhe janë shitur për rreth 8.000 denarë.
Zëdhënësja e SPB Shtipit, Gordana Panajotova ka bërë të ditur se kjo nuk është vjedhja e parë nëpër kishat e Koçanit.
“Vjedhje të këtilla kanë ndodhur thuajse çdo muaj, gjë që u kanë bërë dëme objekteve kishtare. Vjedhje e ngjashme ka ndodhur në manastirin “Shën Petka” në Koçan, kur është thyer dera hyrëse e manastirit dhe janë vjedhur mjetet nga kuzhina dhe kazanët për përgatitje të ushqimit”, ka deklaruar zëdhënësja e SPB Shtipit, Gordana Panajotova.
Sipas evidentimit të arkivit të manastirit, kambanat që janë vjedhur janë të vjetra 150 vjet dhe datojnë që nga vitit 1871 kur në fakt është ndërtuar ky manastir. /tesheshi.com/
