Një vizitë e re e ministrit të Sigurisë Kombëtare të ekstremit të djathtë të Izraelit Itamar Ben-Gvir në një vend fetar në Jerusalem ka tërhequr kritika të ashpra nga pala palestineze dhe aleatët arabë të palestinezëve.
Në vizitën e tij në Malin e Tempullit, siç njihet për hebrenjtë, Ben-Gvir tha: “Jam i emocionuar të vizitoj Malin e Tempullit në Jerusalem, vendin më të rëndësishëm për popullin hebre”.
Ky vend kulti ndodhet në zemër të Jeruzalemit, i njohur për myslimanët si “Tempulli fisnik” dhe për hebrenjtë si “Mali i Tempullit”. Aty ndodhet edhe Xhamia Al Aksa.
Është vendi i tretë më i shenjtë në Islam pas Mekës dhe Medinës. Hebrenjve u lejohet të vizitojnë vendin, por jo të luten atje.
Ministri vlerësoi gjithashtu policinë izraelite, e cila është përgjegjëse për sigurinë në vendin e shenjtë të ndjeshëm të administruar nga myslimanët në majë të kodrës. Puna e tyre tregoi “kush është i zoti i shtëpisë në Jerusalem”, tha Ben-Gvir.
Ben-Gvir kërkon një akses më të madh në Malin e Tempullit për hebrenjtë, por palestinezët kanë frikë se kjo do t’i lejojë Izraelit të zgjerojë kontrollin e tij mbi këtë vend.
Ministria e Jashtme e Jordanisë dhe një zëdhënës i presidencës palestineze dënuan vizitën e politikanit të ekstremit të djathtë si një provokim të rrezikshëm.
“Të gjitha kërcënimet nga Hamasi (fraksioni islamik në pushtet në Gaza) nuk do të ndihmojnë asgjë, ne jemi pronari i Jerusalemit dhe i gjithë tokës së Izraelit,” tha Ben-Gvir gjatë vizitës, duke iu referuar gjithashtu Bregut Perëndimor të pushtuar dhe pjesës lindore e Jeruzalemit nën sundimin arab. Ministri i Sigurisë Kombëtare e vizitoi vendin për herë të fundit në janar, pak pasi mori detyrën.
Një zëdhënës i presidentit palestinez Mahmoud Abbas e quajti vizitën e Ben-Gvir “një sulm flagrant në vendin e shenjtë që do të ketë pasoja të rënda”, sipas agjencisë së lajmeve Ëafa. “Përpjekjet e Itamar Ben-Gvir dhe ekstremistëve si ai për të ndryshuar status quo-në në xhaminë Al-Aksa janë të dënueshme dhe do të dështojnë,” tha ai. /tesheshi.com/
