Ka bërë përshtypje deklarata e Kryeministrit shqiptar në grupin parlamentar të PS-së në lidhje me ndërlidhjen e një pjese të politikës shqiptare dhe një vendi të huaj për të pasur probleme në vend.
I ftuar nga Sokol Balla për të dhënë më shumë hollësi, kryeministri foli, duke dhënë një panoramë më të qartë.
“Partnerët tanë do të zhgënjeheshin, nëse ne do të ndryshonim rrugën që kemi marrë. Por ka të tjerë që do ta dëshironin këtë gjë. Padiskutim. Dhe e fundit, kreu i opozitës është në të drejtën e tij që të mos i dallojë miqtë e mirë dhe jo të mirë të Shqipërisë. Siç partnerët i kanë sytë tek Shqipëria, të tjerë janë të angazhuar, për të kundërtën. Kaq them unë sot. Dhe nuk flas për armiq. Kur themi Greqia, është një shtet dhe ka një qeveri, Maqedonia është një shtet, por nuk ka qeveri. Me Rusinë ne kemi marrëdhënie të ftohtë, por ne nuk e kemi armik. Historia ka treguar se oportunistët janë gati jo flamurin dhe dinjitetin e atdheut, ta vënë në dispozicion për një qëllim që për mua është e shenjtë dhe e panegociueshme dhe që e kanë ndërtuar këtë shtet.” theksoi Edi Rama.
Për ta komentuar apo për të identifikuar se për kë ka folur kryeministri, në fakt nuk është shumë e vështirë dhe mjafton që t’i referohesh një aleance tashmë të konsoliduar politike që ka marrëdhënie të ngushtë me Athinën zyrtare apo qarqe politike në Greqi që duan ta rrëzojnë Edi Ramën.
Vetë Ministri i jashtëm grek, Nikos Kotzias deklaroi në fund të muajit të kaluar se qeveria e Edi Ramës do të rrëzohet.
Këtë e tha pak a shumë edhe Vangjel Dule në një intervistë televizive.
Po ashtu janë dhe deklaratat që kanë pasuar vizitën e Ilir Metës në Athinë dhe joshjen e tij prej “Sirenave” helene se ai i takon politikës së moderuar.
Ndërkaq, prej kohësh ka një marrëdhënie të ngushtë të PD-së, Vangjel Dules dhe qarqeve më ekstremiste greke në Shqipëri dhe jashtë vendit.
Në mënyrë paralele ka ecuar dorëzimi i të gjitha degëve të PD-së së Himarës në favor të PBDNJ-së.
Madje edhe një politikan që u prezantua në çadrën e opozitës si kreu i rinisë republikane të SHBA nuk ishte gjë tjetër veçse personazh i lidhur me qarqet ekstremiste greke.
Këtu nuk është fare problem i lidhjes së aleancës politike me Vangjel Dulen dhe PBDNJ-në, por me vetë shkarjen e Dules drejt ekstremizmit nacionalist dhe krijimit të një klime tensioni në Himarë nga vetë Partia Demokratike duke joshur elementë arrivistë si Neranxi por që duan të përdorin teza që mbështeten në Athinë.
Dhe në kulmin e këtyre zhvillimeve, bie në sy se pikërisht atëherë kur Kotxias tha se do të rrëzohet Edi Ramën, në Athinë ka mbërritur në një vizitë të papritur shefi i diplomacisë shqiptare, Ditmir Bushati, i cili ka zhvilluar një vizitë gati me një axhendë enigmatike.
Çfarë u fol dhe çfarë u tha u deklarua fare pak. Por a mos vallë Bushati u dërgua nga Rama për të mbyllur një marrëveshje në Greqi apo për të paralajmëruar Athinën? Kjo mbetet një enigmë.
Ka kaluar mbi dy javë nga vizita e shefit të diplomacisë shqiptare në Athinë dhe asgjë nuk ka mbetur prej këtij takimi të rëndësishëm, kur dihet se në të tilla raste thuhet diçka që zë vend në publik, aq më tepër kur është fjala për raportet e qeverisë Rama me Greqinë .
Sipas të gjithë njoftimeve si zyrtare, por edhe artikujt e mediave greke e atyre shqiptare, vihet re gjithsesi se ka një tërheqje të lehtë, gati fluide të Tiranës zyrtare nga ngritja e çështjes çame.
Në 4 orët e negociatave mes Ditmir Bushatit dhe Nikos Kotzias është folur më shumë për çështje konsullore se politike.
Në njoftimet e shpërndarë mediave, thuhet se dy ministrat biseduan për gjithë çështjet që preokupojnë fashën e marrëdhënieve dypalëshe, por edhe situatën në rajon.
“Për herë të parë pas 25 vitesh, kemi ngritur Komisionin e Përbashkët për Çështjet Konsullore dhe rezultatet e këtij komisioni do të kenë një impakt të madh, sidomos për komunitetin shqiptar që jeton në Shqipëri. Kemi riaktivizuar Komisionin për tekstet shkollore. Jo thjesht pastrimin e tyre nga referenca historike, të cilat mund të jenë fyese për Shqipërinë apo Greqinë, por edhe për të ndërtuar një të ardhme më të mirë të përbashkët për brezat e rinj. Gjithashtu mendojmë se kemi bërë disa hapa përpara edhe në dakordësimin e pikëpamjeve përsa i përket çështjeve të së shkuarës së largët. Si rasti ligjit të luftës, apo rasti i punës që duhet bërë për varrezat e të rënëve grekë gjatë luftës në Shqipëri”, u shpreh Bushati, ku u theksua se dhe “të dy palët ranë dakord për uljen e tensioneve dhe retorikës nacionaliste të shprehur kohët e fundit mes dy vendeve”.
Kotzias ka kërkuar që problemet mes dy vendeve të mos jenë pjesë e fushatës elektorale të 18 qershorit në Shqipëri, çka duket se ka gjetur edhe dakordësinë e zotit Bushati.
Po çështja çame?! /tesheshi.com/
