Çelsi u bë gjysmëfinalisti i katërt i FA Cup-it në Angli, pasi më herët këtë gjë e kishin arritur dhe Mançester Siti, Arsenali dhe Totenhemi. Kualifikimi i Çelsit i bëri bashkë pas 15 vitesh tre ekipe londineze në gjysmëfinalet e këtij aktiviteti.
Çelsi fitoi 1-0 ndaj Mançester Junajtedit, në një ndeshje të tensionuar, që pati dhe një karton të kuq, të nxjerrë për Herrera-n, lojtarin e skuadrës udhëtuese.
Fitorja për Çelsin do të vinte nga një gol në minutën e 51-të i lojtarit më të mirë të ndeshjes, N’Golo Kante.
Mançester Junajtedi vuajti mungesën e Ibrahimovic-it, Rooney-t dhe Martial-it, me një zotërim topi në vetëm 28 për qind të lojës, më e ulëta për të gjatë këtij sezoni.
“Djajtë e kuq” do ta pësonin keq dhe tetorin e shkuar në “Stamford Bridge”, kur për kampionat mundeshin thellë, 4-0. Që atëherë u dhanë sinjalet e para të një përplasjeje mes ish-teknikut të Çelsit, Mourinho-s, dhe atij aktualit, Antonio Conte-s. Portugezit nuk i pati pëlqyer mënyra e festimit të italianit.
Një antipati që u shpërfaq më fort mbrëmë, kur u desh vetëm ndërhyrja e gjyqtarit të katërt për të shmangur përplasjen fizike mes tyre. Veç kësaj, Mourinho u prit mjaft keq nga tifozët e Çelsit, i kthyer tanimë në një “Judë” për ta. Tre gishtat e Mourinho-s si përgjigje për të pranishmit në stadium simbolizonin sukseset e tij me Çelsin, tre kampionatet e fituara.
Me rezultatin e mbrëmshëm, Çelsi e çoi në 12 serinë e ndeshjeve në të gjitha aktivitetet ku nuk njeh humbje ndaj Mançester Juınajtedit.
Gjysmëfinalet e FA Cup-it kanë vënë përballë Çelsin me Totenhemin dhe Arsenalin me Mançester Sitin; dy takime që do të luhen më 22 e 23 prill. /tesheshi.com/
