Nga Blendi Gashi
Vizita e Isa Mustafa në veri të Kosovës vazhdon të jetë një temë që po shkakton deklarata kundërthënëse nga vet qeveritarët.
Ndërsa ministrat e kabinetit dhe këshilltarët e kryeministrit e cilësojnë këtë vizitë historike, analistë dhe opozitarë e quajnë vizitë të dështuar për faktin se kreu i ekzekutivit kosovar nuk u lejua nga një grup serbësh që të shkojë në përurimin e urës në veri nga rruga kryesore, duke devijuar në rrugë alternative.
Ky nënshtrim i Mustafës ndaj një grupi serbësh në veri, la në hije shkeljen e kyreministrit në këtë pjesë, vizitë e proklamuar qysh para gjashtë muajsh.
“Ministër Demolli, ura në veri u ndërtua nga qeveria apo KFOR-i”?
Por ministrat e kabinetit qeveritar “Mustafa”, bën deklarata jo të matura lidhur me vizitën në fjalë.
Ndersa ministri i Brendshëm gënjeu opinionin kosovar se “nuk janë penguar nga askush dhe kanë realizuar vizitën pa probleme”, gjë që u demantua në një mënyrë edhe nga shefi i tij Mustafa, është një ministër tjetër që shkeli në veri dhe më pas i ekzaltuar siç duket me këtë, dha një deklaratë tejet kundërthënëse.
Bëhet fjalë për ministrin e Forcës së Sigurisë së Kosovës (FSK), Haki Demolli, i cili si edhe shumë zyrtarë qeveritarë përmes një shkrimi në Facebook e cilësoi historike vizitë e Mustafës.
Për dallim nga vet Mustafa e Hyseni, të cilët bën deklarata kontradiktore për (mos)pengimin nga serbët, ministri i FSK-së Demolli duke u munduar ta paraqesë si sukses të qeverisë ndërtimin e urës në veri, brenda një shkrimi të shkurtër demanton veten.
Demolli, duke marrë për një moment rolin e ministrit të Financave apo Zhvillimit Ekonomik, ndërtimin e urës ia mvesh si sukses qeverisë “Mustafa”.
Në paragrafin e mesëm ai shkruan: “e konsideroj historike këtë vizitë të kryeministrit Mustafa në veri të vendit pasi tregon vendosmërinë që të arrihet progres në ndërtimin e insfrastrukturës”.
Por Demolli demanton veten me shkrimin e paragrafit të fundit, ku ja humb “investimin” qeverisë, pasi shkruan: “Një falënderim i posaçëm për trupat e KFOR-it për ndërtimin e urës” (që lidh dy komunat veriore të Republikës së Kosovës, Leposaviqin dhe Zveçanin).
Pra, së pari ndërtimin e urës ia atribuon si sukses qeverisë e më pas e falënderon KFOR-in për ndërtimin e saj.
Vërtetë një deklaratë kontradiktore dhe e pamenduar nga ministrit në fjalë, por, këto zakonisht ndodhin kur ministra të caktuar mundohen të thurin lavde të njëpasnjëshme për “shefin” e tyre.
“Asnjë fjalë për pengesën që iu bë nga serbët”
Është e çuditshme se si ministri Demolli nuk ka shkruar asnjë rresht për bllokimin që ju është nga serbët dhe të tregojë se si shkuan deri tek ajo përmes rrugës alternative.
Për më tepë, ai vizitën e Mustafës mundohet ta shes si fuqizim të sovranitetit të Republikës.
Andaj, shtrohet pyetja për çfarë vendosmërie dhe fuqizim të sovranitetit të shtetit po flet ministri Demolli, kur kreu i qeverisë nga një grup prej 200 serbësh u detyrua të ndjek rrugët alternative?!
Ministri Demolli e di më së miri se komuniteti serb në vend aspak nuk e çan kokën për “shefin” e tij, pasi është pikërisht Lista Serbe që po e mban të bllokuar formimin e ushtrisë së Kosovës.
Pavarësisht statuseve lavdëruese në rrjete sociale, krerët e shtetit duhet ta kenë të qartë se tashmë në kohën e internetit nuk mund t’i mashtrojnë aq lehtë qytetarët siç mund të ketë ndodhur në vitet e pasluftës kur informimi ka qenë më i mangët dhe qytetarët kanë “hëngër”, lloj lloj gënjeshtre që ju është sërvuar.
Por në Kosovë tashmë është fakt i gjallë se drejtuesit e institucioneve të shtetit çdo herë fasin e shkruajnë vetëm për “suksese” dhe asnjëherë për dështimet. /tesheshi.com/
