Arkivi Shqiptar ka sjellë në kujtesë vizitën e bujshme në Tiranë të një prej shtetarëve të mëdhenj të Gjermanisë (Perëndimore në atë kohë), ku në takimin me Ramiz Alinë, nga ky i fundit i është përmendur Enver Hoxha.
“Si sot, më 16 nëntor 1987, kryeministri i landit të Bavarisë, Franz Josef Strauss-i, vizitoi Shqipërinë.
Ish-funksionari i lartë i Republikës Federale të Gjermanisë u prit në Pallatin e Brigadave prej presidentit shqiptar të kohës, Ramiz Alisë. Gjatë bisedës së zhvilluar (e zbardhur në dokumentin më poshtë), Alia e komentoi takimin dhe vendosjen e marrëdhënieve diplomatike dypalëshe, si rezultat të një vullneti të përbashkët.
Flasin shumë jashtë: hapet Shqipëria, mbyllet Shqipëria. Në fakt, Shqipëria është ajo që ka qenë: ajo politikë e shtetit shqiptar e përcaktuar nga shoku Enver ndiqet edhe sot. Ne kemi qenë dhe jemi të hapur ndaj çdo gjëje e ndaj çdo shteti që respekton lirinë dhe pavarësinë e popullit shqiptar, kemi qenë e jemi të mbyllur ndaj çdo gjëje e shteti që nuk e respekton lirinë e pavarësinë tonë’, citohet të ketë thënë Alia në bisedime me Strauss-in.
Gjatë takimit u fol edhe mbi problemet e bashkëpunimit ekonomik e tekniko-shkencor. I pranishëm nga delegacioni gjerman ishte edhe Sekretari i Shtetit në Ministrinë Federale për Bashkëpunimin Ekonomik, Zigfrid Lengl”, shkruhet nga Arkivi Shqiptar.
Kjo vizitë atë kohë u morr si shenjë hapjeje e Shqipërisë me Perëndimin. Të vizitonte Tiranën një autoritet i lartë gjermanoperëndimor, ishte diçka e jashtëzakonshme dhe me mesazh të madh.
Por siç është trajtuar apo komentuar më vonë kjo vizitë, pushteti komunist i kohës refuzoi disa oferta të fuqishme ekonomike gjermane në emër të besnikërisë ideologjike, ose ndryshe enveriste. /tesheshi.com/
